Në fakt e kishte paralajmëruar. Presidenti Ivanov i ka thënë “Jo” zyrtarizimit të shqipes si gjuhë e dytë zyrtare në Maqedoni, pjesë e ligjit të dygjuhësisë miratuar ditë më parë në Kuvendin maqedonas.
Pretendimi ka qenë po ai: rrezikon karakterin unitar të shtetit, sovranitetin dhe integritin territorial të Maqedonisë; rrezikon gjithashtu edhe bllokimin e tërësishëm të organeve shtetërore.
Në një dalje për shtyp, Ivanov tha se duke marrë parasysh vlerësimin e ekspertëve për antikushtetutshmërinë e këtij ligji, vendosi që të mos e firmosë atë.
Por më tepër se kaq nuk ka çfarë t’i bëjë. Ligji tashmë kthehet sërish në parlament për t’u ballafaquar me votën e deputetëve dhe nëse kalon, nuk ka nevojë për dekretim dduke hyrë në zbatim menjëherë.
Shqipja ishte një ndër pikat kushtëzuese të Platformës së Tiranës, hartuar nga faktori politik shqiptar në Maqedoni, nën hyqmin e kryministrit Rama. Madje ky i fundit rrahu gjoksin së fundi duke ia dedikuar si meritë qeverisjes së forcës që drejton, PS-së.
Sakaq, mu prej shqipes, Platforma e Tiranës u kundërshtua ashpër nga VMRO-ja e Gruevskit, së bashku me këtë të fundit, e gjithashtu nga presidenti Ivanov. /tesheshi.com/
