Vajza e ish-presidentit amerikan Donald Trump, Ivanka, mori një çmim nga shteti çek për nder të nënës së saj të ndjerë Ivana Trump, e cila emigroi në Shtetet e Bashkuara në vitet 1970, por mbante lidhje të ngushta me vendin e lindjes.
Presidenti çek Milos Zeman bëri homazhe për Ivana Trump, e cila vdiq në moshën 73-vjeçare në korrik, së bashku me figura të tjera, duke përfshirë tenistin Ivan Lendl, luftëtarin e rezistencës anti-naziste Josef Masin dhe presidentin ukrainas Volodymyr Zelensky.
Një përfaqësues nga ambasada e Ukrainës në Pragë e pranoi çmimin në emër të Zelensky-t.
Ivanka Trump, e cila shoqërohej nga bashkëshorti i saj Jared Kushner dhe vëllai i saj më i madh Donald Jr., u takua privatisht me Zemanin përpara ceremonisë së mbajtur në Kështjellën e Pragës.
Ivana Maria Zelnicova, më vonë Ivana Trump, u rrit në qytetin e Zlinit, rreth 300 km nga Praga. Ajo u takua me Donald Trump në një udhëtim modelimi në New York në vitin 1976 dhe u bë gruaja e tij e parë kur u martuan nëntë muaj më vonë.
Çifti kishte tre fëmijë dhe u divorcua në vitin 1992.
Ivana Trump i tha CBS në vitin 2017 se Trump i kishte ofruar asaj postin e ambasadores së SHBA në Republikën Çeke, por ajo e hodhi poshtë ofertën.
Ajo vdiq në verë në rezidencën e saj pas një aksidenti që pati në shkallët e brendshme. /tesheshi.com/
