Deputeti i Vetëvendosjes-s, Dardan Molliqaj ka reaguar ashpër pas dënimit të bashkëpartiakëve të tij me mbi 21 vjet burg, i cili tha se nuk ekziston asnjë provë që implikon aktivistët në sulmin mbi ndërtesën e Kuvendit.
E për këtë, ish-sekretari i përgjithshëm i kësaj partie, në një konferencë për media u betua në emër të Vetëvendosje-s se do t’i dërgojë në burg “Klanin Pronto” në krye me Kadri Veselin, e “Klanin e Dorëzimit”, LDK-në me në krye Isa Mustafën.
Molliqaj tha se Gjykata e Apelit do t’i lirojë aktivistët e Vetëvendosjes, sepse nuk ka fakte, por dënimi është politik.
Katër aktivistët e Vetëvendosjes Frashër Krasniqi, Atdhe Arifi, Egzon Haliti dhe Adea Batusha janë dënuar sot me 21 vjet e gjysmë burg për sulmin ndaj ndërtesës së Kuvendit në gushtin e vitit të kaluar. /tesheshi.com/
