Ndërsa qeveria i ka thënë “PO” mbajtjes së zgjedhjeve presidenciale serbe në Kosovë, analistë dhe qytetarë të Mitrovicës shprehen kundër.
Analisti politik, njëherit qytetari i Mitrovicës, Nexhmedin Spahiu, thotë se zgjedhjet në fjalë është dashur të rregullohen përmes përfaqësuesit diplomatik serb në Kosovë, sikur që bëhen zgjedhjet e shtetasve turq në Gjermani, ose çfarëdo vendi tjetër.
“Fakti që po tolerohen të mbahen zgjedhjet sikur Kosova të jetë pjesë e Serbisë, mendoj se është e pakuptimtë dhe qëndrimet e qeverisë ndaj hyrje daljeve të kandidatëve presidencialë nuk janë në rregull. Natyrisht do të duheshin të krijojnë një rregull nëse do të lejohet dhe çfarë kushte do të lejohen për kandidatët presidencialë për të marr pjesë në fushatë në Kosovë… Për shembull ta lejojë Vuçiqin mos ta lejojë Sheshelin ose anasjelltas… Ne qytetarët e Kosovës do të donim që të fitonte Çanak sepse është i vetmi që pranon pavarësinë e Kosovës”, ka thënë Spahiu, për “Kosova Press”.
Edhe banorët shqiptarë të Mitrovicës janë shprehur kundër këtyre zgjedhjeve në vendin tonë.
Agim Dërguti tha se mbajtja e këtyre zgjedhjeve nuk është e drejtë dhe se institucionetështë dashur të marrin masa.
“Kjo nuk është e drejtë. Institucionet e Kosovës duhet me marrë masa mos me leju zgjedhje të Serbisë në territorin e Kosovës, përderisa ne jemi shtet i shpallur, nuk ka nevojë me umbajt zgjedhje të Serbisë në Kosovë… Mbase edhe mundet me pas, nuk i dihet. Qytetarët vlerësojnë vet dhe vendosin vet tek e fundit kur s’ka institucione të mirëfillta”, tha ai.
Shefqet Begu, qytetar, u shpreh po ashtu kundër mbajtjes së këtyre zgjedhjeve në territorin e Kosovës. Ai tha se edhe shqiptarët e Luginës duhet pra të votojnë atje për zgjedhjet që do të mbahen në Kosovë.
Ndryshe, zgjedhjet presidenciale të Serbisë do të mbahen të dielën më 2 prill dhe do të monitorohen nga Misioni i OSBE-së. /tesheshi.com/
