Antonio Conte do ta mbyllë aventurën e tij me kombëtaren italiane të futbollit menjëherë pas Kampionatit Europian. Tekniku italian me shumë gjasa do të nisë më pas një aventurë në Angli, ku e pret stoli i Chelsea-t.
Vendimin e njoftoi së pari shefi i federatës italiane të futbollit, Carlo Tavecchio. “Conte do ta lërë ekipin kombëtar pas Kampionatit Europian.”
Tavecchio ka shpjeguar se vendimi nuk ka të bëjë me paratë, por është diçka tjetër. “Ai dëgjon thirrjen e fushës dhe të punës së përditshme, që është e kuptueshme.”
Conte nuk ka vonuar ta pohojë lajmin dhe të thotë se për momentin është i përqendruar te Euro 2016-ta.
“Përqëndrimi më i madh tani është vetëm te Kampionati Europian, ku do të përpiqemi të shfrytëzojmë më së miri potencialin tonë,” ka thënë tekniku 46-vjeçar.
“Kush më njeh e di se angazhimi im do të jetë i plotë. Pastaj e ndiej se duhet të kthehem të stërvis një klub, ku stërvitja zhvillohet çdo ditë,” ka shtuar ai në mesazhin e shkruar në një rrjet social. /tesheshi.com/
