Nga: Ylli Pata
Pas dy ditësh nis votimi në Tiranë për postin që ka marrë sot realisht peshën e dytë në qytet pas kryebashkiakut.
Kemi të bëjmë me një duel të fortë, me ethe endemike, së cilës nuk i shpëton asnjë manovër e mjet vetëm e vetëm për arritjen e qëllimin final: fitoren.
Po kush janë dy kandidatët për rektor të Universitetit të Tiranës, gara për të cilin ka dalë jashtë çdo caku të ndodhur deri më sot, që sipas gjasave do të ketë edhe përfshirjen e fortë të politikës, duke e kthyer garën akademike në një lojë nervash PS-PD.
Edhe pse nuk thuhet hapur, edhe këtë herë do të ketë një garë politike për Universitetin e Tiranës. Ndryshe nga herët e tjera, nuk ka një politizim direkt, por një marrje nga krahët.
Dy kandidatët përfaqësojnë njëkohësisht preferencën e dy rivalëve politikë në vend: Klodeta Dibra përkrahet në distancë nga Edi Rama, i cili e ka mbështetur për të qenë anëtare e Këshillit Bashkiak, ndërsa Sali Berisha mbështet Mynyr Konin, edhe prej lidhjes së tij me rektorin aktual në detyrë, Dhori Kule.
Klodeta Dibra
Ish-basketbollistja e Tiranës në vitet ‘80 të shekullit të kaluar, vetëm rastësisht duket se ka qenë në të njëjtën kohë me Edi Ramën në sportin e koshit. Dibra, ndryshe nga Rama që luajti me Dinamon, ishte basketbolliste shumë e rëndësishme e 17 Nëntorit.
Kandidatja për rektore e Universitetit të Tiranës është një akadamike në fushën e Filologjisë,
përkatësisht të gjuhëve të huaja. Të asaj italiane në veçanti, ku është një doktore e shkencave dhe mban titullin e profesoreshës prej shumë vitesh.
Edhe pse nuk është anëtare e asnjë partie, Klodeta Dibra u thirr nga Edi Rama për të qenë pjesë e listës së Këshillit Bashkiak të së majtës në zgjedhjet e 21 qershorit 2015.
Dibra, në një prononcim të bërë dje për çështjen “Shullazi”, e cilësoi si të shëmtuar dhe si një presion të egër për postin e rektorit, që vinte nga PD-ja. Nëse Dibra zgjidhet, Universiteti i Tiranës do të drejtohet për herë të parë nga një grua.
Mynyr Koni
Kandidati tjetër për postin e rektorit vjen nga Fakulteti i Shkencave të Natyrës, ku është dekan prej vitesh.
Biologu gjenetist Mynyr Koni e ka të përqendruar të tërë kohën në karrierën e tij me aktivitet akademik, që nga diplomimi dhe deri më sot.
Akademia e Shkencave dhe Fakulteti i Shkencave të Natyrës janë vendet e vetme ku ka qenë i punësuar professor Koni, i cili mban edhe titullin “Honoris Causa” i Universitetit të Tetovës.
Ai ka njohje të ngushtë me rektorin aktual të Universitetit të Tiranës, që i mbaron mandati, Dhori Kulen, i cili e përkrah fuqishëm në garën për rektor. Është ky i fundit që i kërkoi publikisht ish-kryeministrit Sali Berisha të pronononcohet hapur në favor të Konit, duke përmendur rastin Shullazi.
Por profesor Koni nuk ka bërë asnjë denoncim në prokurori për kërcënim ndaj tij dhe familjes. /tesheshi.com/
