Rojet bregdetare italiane lajmëruan të dielën se shpëtuan 1500 emigrantë që po përpiqeshin të kalonin Mesdheun për në Itali, të gjendur në pesë mjete lundruese të ndryshme.
Tre prej mjeteve lundruese dërguan sinjale për shpëtim, ndërsa dy të tjerat u pikasën teksa anijet italiane po shkonin për ndihmë.
Emigrantët u mbartën të tërë në anijet italiane dhe u dërguan në ishullin e Lambeduzës apo në portet e Sicilisë.
Mbi 170.000 emigrantë hynë në Bashkimin Europian përmes Italisë në 2014-n, të ardhur me rrugë detare më së tepërmi nga brigjet afrikane, ndërsa më shumë se 3.000 persona humbën jetën gjatë përpjekjes së tyre.
Gjatë dy muajve të parë të këtij viti ka patur një rritje me 43 për qind të të ardhurve krahasuar me të njëjtën periudhë të vitit të shkuar, kanë njoftuar zyrtarët.
Një pjesë e mirë e të mërguarve vijnë nga Afrika Veriore, të përballur me një varfëri të tejskajshme dhe me një gjendje të pashpresë në vendet e tyre.
Situata e paqetë në Libi, dhe luftimet atje mes grupeve rivale, kanë patur një ndikim të qenësishëm në shtimin e emigrantëve që vënë këmbën në brigjet italiane pas udhëtimeve nga përtej detit. /tesheshicom/
