Një formacion eksperimental i Italisë e mposhti keqaz San Marinon në një miqësore të së mërkurës.
E luajtur në Empoli, ndeshja do të përfundonte 8-0, me tre prej golave të shënuar nga Lapadula.
Përballja ngjante më shumë me një seancë stërvitore. Te italianët mungonin tërësisht emrat e njohur, ndërkohë që lojtarët e San Marinos nuk do të mundeshin dot ta shfrytëzonin këtë mundësi. Topi qe në këmbët e tyre vetëm në 33 për qind të kohës së lojës, përpos faktit se ata nuk arritën të gjuajnë asnjë goditje nga këndi, e patën vetëm dy gjuajtje në portë.
Giampiero Ventura, tekniku i italianëve, ruajti modestinë pas ndeshjes, duke thënë se fitorja 8-0 “nuk llogaritet”.
Ai e pranoi se kundërshtari nuk ishte i një niveli të lartë, por megjithatë ngjante i kënaqur me paraqitjen e lojtarëve të tij.
“Nuk e di nëse disa nga këta djem do të ishin të dobishëm kundër Spanjës, por ca prej tyre do të jenë patjetër pjesë e ekipit kombëtar të së ardhmes.”
Italia do të luajë të mërkurën e ardhshme një tjetër miqësore, ndaj Uruguajit, e më 11 qershor ndeshet me Lihtenshtajnin për eliminatoret e Botërorit 2018. /tesheshi.com/
