Italia ka ndaluar së fundi edhe udhëtarët nga Serbia, Kosova dhe Mali i Zi që të hyjnë në vend për të parandaluar importin e COVID-19 me raste nga jashtë.
“Të gjithë ata që kanë qëndruar në këto vende në 14 ditët e fundit janë ndaluar të hyjnë dhe të kalojnë nëpër Itali. Epidemia është në fazën e saj më të vështirë në botë. Ne kemi nevojë për kujdes maksimal për të mbrojtur përparimin që kemi bërë deri më tani”, tha Ministri i Shëndetësisë Roberto Speranza.
Vendimi do të bllokojë trafikun ajror, hekurudhor dhe trafikun tjetër që lidh Italinë me territoret e përmendura, njoftoi agjensia ANSA.
Javën e kaluar, Italia ndaloi hyrjen e personave që vinin nga 13 vende, përfshirë Brazilin, për të cilin thuhet se ka një shkallë të lartë të rasteve të infektuara me COVID-19.
Bosnja dhe Maqedonia Veriore ishin gjithashtu në listën e javës së kaluar.
Italia është vendi i parë evropian që vendosi masa të rrepta karantine në të gjithë territorin në fillim të marsit, dhe doli nga bllokada duke lehtësuar gradualisht masat pas afro tre muaj.
Edhe pse numri i rasteve të reja në Itali është në rënie, zyrtarët italianë të shëndetësisë janë të shqetësuar për numrin në rritje të të infektuarve jashtë kufijve të vendit.
Siç mund të vihet re, Shqipëria është e përjashtuar nga ky ndalim. /tesheshi.com/
