Italia po konsideron masa fiskale për të inkurajuar investimet në industrinë e automobilave dhe turizmit, të dy sektorët më të goditur nga pandemia e koronavirusit, tha kryeministri Giuseppe Conte.
Duke folur në një konferencë të organizuar nga sindikata UIL, Conte tha se qeveria duhet të “ripërcaktojë” zbritjet e taksave në favor të investimeve të gjelbërta, dixhitale, duke shtuar se “ne duhet të mbështesim industritë e goditura më keq siç janë ajo e makinave dhe ajo e turizmit”.
Qeveria do të fillojë të punojë për një reformë gjithëpërfshirëse të taksave javën e ardhshme, tha ai, por nuk dha shpjegime të mëtejshme.
Vendi i pestë më i vizituar në botë
Industria e automobilave përbën 6.2 përqind të produktit të brendshëm bruto të Italisë, sipas Fiat Chrysler Automobiles.
Parlamenti i Italisë të premten i dha dritën e gjelbër një pakete stimulimesh për shitjen e motorëve me djegie më të lartë, si dhe automjeteve elektrike dhe hibride, thanë dy ligjvënës për Reuters.
Sipas Kombeve të Bashkuara, Italia është vendi i pestë më i vizituar në botë, dhe turizmi përbën rreth 13 përqind të PBB-së, sipas Këshillit Botëror të Tregtisë dhe Turizmit. /tesheshi.com/
