Gjykata më e lartë e Italisë vendosi që kultivimi i sasive të vogla të kanabisit në rrethana shtëpiake të jetë e ligjshme, një vendim ka nxitur dhe më tej avokatët e legalizimit të marihuanës, duke zemëruar kështu edhe më shumë konservatorët.
Gjykata Italiane e Kasacionit u thirr për të sqaruar interpretimet kontradiktore të ligjit dhe vendosi që krimi i kultivimit të drogës duhet të përjashtojë “sasi më të vogla të kultivuara në shtëpi për përdorimin ekskluziv të kultivuesve”.
Vendimi ka nxitur debat politik mbi përdorimin e kanabisit në Itali,.
“Gjykata i ka hapur rrugën, tani varet nga ne,” tha Matteo Mantero, një senator nga Lëvizja Pesë Yje, një partner i koalicionit në qeveri.
Mantero paraqiti një ndryshim në buxhetin e vitit 2020 për të legalizuar dhe rregulluar përdorimin e kanabisit për përdorim personal, por u shpall i papranueshëm nga Forza Italia.
“Droga bën dëm” tha Matteo Salvini, drejtuesi i LEGA-s, në lidhje me shitjen në dyqane të “barit ligjor” në sasi të vogla, i cili është i përhapur në Itali.
Maurizio Gaspari, një senator i partisë Forza Italia që është aleat i LEGA-s, ka njoftuar se ligji do të anullohet sa po të vihet në pushtet.
Salvini, i cili shërbeu si ministër i Brendshëm deri në lënien e qeverisë në gusht, insistoi në mbylljen e dyqaneve legale të marijuanës dhe përshëndeti një vendim gjykate në maj që shumë prej këtyre produkteve duhen ndaluar.
Kjo tregti ka lulëzuar në tre vitet e fundit në Itali falë një ligji të vitit 2016 që lejon kanabisin që ka një përbërës aktiv psikotropik (THC) nën 0.6 përqind.
Ndërsa Lëvizja Pesë Yje është në favor të një qasje më liberale ndaj kanabisit, aleatët e saj të majtë dhe të qendrës janë më të kujdesshëm, dhe legjislacioni i ardhshëm për këtë çështje mbetet i pasigurt. /tesheshi.com/
