Një ndeshje pa shije, pa gjëra të bukura, me simulime të trasha, përballja mes Italisë dhe Suedisë po shkonte drejt një barazimi pa gola, që do të ishte i dyti në këtë turne. E pikërisht atëherë, shumë afër fundit, në minutën e 88-të, Eder ka shënuar për italianët, duke i lënë me gisht në gojë suedezët.
Italia vinte në takimin e sotëm pas asaj fitoreje bindëse ndaj Belgjikës, duke patur tre pikë të plota në grupin E. Kurse Suedia nuk kishte siguruar më tepër se një pikë ndaj Irlandës, duke dhënë që prej atij barazimi shenjat e një skuadre pa imagjinatë, e gati të pashpresë.
Sfida midis Italisë dhe Suedia u karakterizua më tepër nga lufta në mesfushë, ku pati dhe dyluftime të ashpra. Pak u hodh vështrimi nga portat kundërshtare, edhe për shkak të mungesës së fantazisë në krijimin e aksioneve në të dy kampet.
Italia dukej të qe më e prirur për një barazim të pamundimshëm, që përsëri do ta mbante atë në pozita të mira në grup. Kjo falë dhe mungesës së ngacmimit nga suedezët, që edhe pse me Ibrahimovic-in në fushë, nuk e goditën asnjëherë portën kundërshtare.
Mes një loje të mërzitshme, si shkrepëtimë në qiell të hapur, ka ardhur dhe goli i Ederit, që i jep fitoren 1-0 Italisë.
Koha nuk u mjafton suedezëve që të reagojnë, duke u detyruar ta pranojnë humbjen. Italianët bëhen me gjashtë pikë dhe kualifikohen për në fazën tjetër të Euro 2016-tës, e Suedia ia bën shumë të ngatërruar situatën vetes, me vetëm një pikë pas dy ndeshjesh, e me një këmbë jashtë aktivitetit europian. /tesheshi.com/
