E majta italiane, edhe pse ka humbur zgjedhjet e së dielës është kthyer në strumbullarin e debatit politik në Itali.
Kjo pasi asnjëra prej partive që kanë fituar relativisht, 5 Yjet apo Lega nuk i ka numrat për të formuar qeverinë e re.
Kandidati i 5 Yjeve për kryeministër, Luigi di Maio, në një letër të hapur dërguar në La Repubblica hap debatin për të kërkuar të majtën si partnere në qeveri.
Ndërkohë, Matteo Salvini, lideri i Lega Nord, akuzon 5 Yjet dhe PD-në se po shkelin votën e italianëve. Vetë PD-ja ndodhet në një situatë të vështirë pas dorëheqjes së Matteo Renzit.
Gjithçka do të sqarohet në mbledhjen e së hënës së ardhshme kur do të mblidhet kryesia e partisë, e cila nuk është thjeshtë si tek ne një forum i vogël 15-20 vetësh, por një Komitet Drejtues prej mbi 100 vetësh.
Regjenti i PD-së, Martino ka dalë në konferencë për shtyp dhe ka sqaruar se 90% e partisë është që të mos ketë asnjë koalicion edhe me të djathtën edhe me 5 Yjet.
Por ka zëra brenda PD-së që nuk e përjashtojnë këtë tezë. I vetmi variant për të bërë qeverinë aktualisht mbetet koalicioni 5 Yjet dhe Lega, por krerët e të dy partive nuk lëshojnë për postin e kryeministrit.
Di Maio thotë se i takon atij si parti e parë, kurse Salvini thekson se i takon atij si partia e parë e koalicionit fitues. Këtu ka mbetur fjalëkryqi, që duket do të zgjidhet kur të futen në lojë grupet e mëdha industriale. /tesheshi.com/
