Kryebashkiaku i një qyteti të vogël pranë Napolit u detyrua të mbyllë pjesën më të madhe të zyrave të bashkisë pasi policia arrestoi 23 pjesëtarë të stafit të tij në skandalin më të fundit të mashtrimit me ditët e punës në sektorin publik italian.
Stafi u filmua duke vendosur kartën që mat orarin e punës në pajisjen e posaçme dhe më pas largohej për punët e veta. Në raste të tjera, ata përdornin disa karta për të regjistruar kolegët që mungonin në punë, tha policia, në skena që tashmë në Itali janë bërë të zakonshme pas një numri të madh skandalesh të tilla.
Në një video të policisë tregohet edhe një person që përpiqet të shmangë kamerën e sigurisë e më pas vendos në kokë një kuti kartoni për të fshehur identitetin e tij përpara se të çekojë dy karta pune.
Policia arrestoi rreth gjysmën e të punësuarve në zyrat e bashkisë së Boscotrecase pas një hetimi disa javor që sipas policisë nxorri në shesh 200 raste të mungesës në punë, e që përfshinin 30 persona.
Një e treta e stafit të bashkisë në këtë qytet italian është nën akuzë për mungesa në punë, fshehje të këtij fakti me anë të manipulimit të kartave.
“Me gjasa do më duhet ta mbyll fare bashkinë”, tha Pietro Carotenuto, kryebashkiaku i zgjedhur një muaj më parë në krye të qytetit me 11 mijë banorë.
Ai tha se katër departamente të rëndësishme të bashkisë tashmë janë të mbyllura për shkak të mungesës së stafit. Të arrestuarit, që akuzohen për mashtrim kundër shtetit, përfshinin edhe kreun e policisë lokale të trafikut si dhe kreun e departamentit të financave të bashkisë.
Punonjësit, arrestimet e të cilëve vijnë mes një vale kontrollesh kundër mungesave të paarsyetuara dhe të paguara në punë, janë pezulluar nga detyra për rreth gjashtë deri në 12 muaj, duke rrezikuar shkarkimin.
Përgatiti: Juli Prifti – /tesheshi.com/
