Nga Roberta Polese, Nicola Rotari, Corriere della Sera
Goditje në kokë me një objekt të mprehtë, sytë e ënjtur, mavijosje të dukshme në gjoks, hemorragji e brendshme. Nuk ishte një rënie nga lartësia, dhe as rryma e detit në Piave. Aleks Marangon, baristi 25-vjeçar nga Venecia i gjetur i vdekur më 2 korrik në një ishull të Piaves, në zonën e Trevizos, u rrah për vdekje midis orës 2 dhe 6 të mëngjesit të së dielës së 30 qershorit.
Autopsia: “Është vrasje”
Bazuar në rezultatin e autopsisë, Prokuroria e Trevisos e ka ndryshuar tashmë titullin e dosjes: “Hetim i vrasjes me dashje ndaj personave të panjohur”.
Mbrëmjen e së shtunës së 30 qershorit, Aleks kishte marrë pjesë në një festë shamanike të organizuar nga ndjekësit e disiplinës së njohur në Amerikën e Jugut, e cila synon të shërojë plagët e trupit dhe shpirtit me muzikë dhe pirjes së lëndëve bimore me efekte narkotike psikodelike, si ajahuaska.
Orët e fundit të jetës: Festivali shamanik në brigjet e Piaves
Riti u mbajt në Manastirin e Shën Bonës në Vidor, në zonën e Trevizos, ku morën pjesë rreth 20 persona, të cilët janë tashmë të gjithë të dyshuar dhe do të merren në pyetje nga hetuesit. “Ylli i ftuar” i mbrëmjes ishte i vetë-quajturi “njeriu i shenjtë”, shamani nga Kolumbia Xhoni Daniel Benavides, një nga themeluesit e lëvizjes fetare që pretendon se shëron përmes muzikës dhe barishteve me efekte narkotike.
Ai zgjodhi Vidorin si aktivitetin e vetëm që do të mbante në Itali. Në një moment, sipas dëshmitarëve, Aleksi (që kishte konsumuar në dy raste barishte psikodelike) u ngrit nga dhoma ku mbahej rriti dhe doli jashtë në oborr.
Rindërtimi i skenës së incidentit…
Dy persona, nga 20 të pranishmit, thanë se e ndoqën nga pas dhe duke mos e gjetur, u rikthyen në dhomën ku kryhej riti. Sipas një versioni të parë të ngjarjeve, Aleks u rrëzua nga muret e manastirit dhe përfundoi në ujërat e Piaves, që më pas e tërhoqi për shtatë kilometra më në jug. Por ky variant nuk qëndron për shkak të rezultateve të autopsisë.
Trupit i të riut ishte i mavijosur nga rrahja brutale, dhe e kishte kafkën e shtypur, jo nga rënia, por sepse dikush e goditi disa herë. Sipas prokurorit të Trevizos, Marko Martani, i riu është “rrahur rëndë”, dhe për këtë arsye ka ndryshuar edhe hipoteza e krimit. Rrahja zgjati rreth një minutë dhe pas goditjes në kokë Aleks mund të ketë vdekur brenda 20 sekondash.
Familja e 25-vjeçarit: “Duam të dimë të vërtetën”
Për familjen Marangon, i riu u vra sepse në një moment të caktuar në atë “festë” ndodhi diçka e rëndë dhe Aleksi donte të largohej. “Familjarët janë të dëshpëruar, dhe kërkojnë që cilido që di diçka të flasë, pasi është e qartë se atje ka ndodhur diçka”, shpjegon avokati i familjes Marangon, Stefano Tigani. “Policia do të kryejë të gjitha hetimet, edhe pse unë kam përshtypjen se së shpejti do ketë të reja. Të pranishëm atë natë ishin 20 vetë. A është e mundur që askush të mos ketë parë gjë?”.
Grupi i muzikantëve që kishin organizuar mbrëmjen
Midis 20 personave të pranishëm në atë “festë”, përfshiheshin edhe gjithashtu muzikantë që e organizuan atë, përkatësisht Zu Music, një kompani e Trevisos që ka përqafuar kauzën e shamanit Benavides, Andrea Zuin dhe partnerja e tij Tatiana Marketo.
Pronarët e manastirit të vjetër kanë pajtuar avokatin e njohur Çezare Dal Mazo për të mbrojtur emrin e mirë të familjes: “Ditët e fundit qentë e policisë kanë kërkuar kudo nëpër manastir dhe nuk kanë gjetur gjurmë gjaku. Atëherë, si mund të shpjegohet hipoteza e rrahjes?”, pyet avokati.
Ndërkohë karabinierët janë rikthyer në vendngjarje për hetime të mëtejshme, dhe nga sot do të nisin intervistimin e personave të pranishëm në atë ngjarje me një fund tragjik për të riun Aleks Marangon.
