Në ditën e heshtjes elektorale, Instituti i Studimeve Politike u bëri thirrje publike qytetarëve, të rinjve dhe grave për të votuar.
Afrim Krasniqi, drejtori ekzekutiv i ISP tha se këto janë zgjedhje të rëndësishme për një vend që aspiron për në Bashkimin Europian. Duke thënë se partitë politike kanë akuzuar njëra-tjetrën, ai u shpreh se sot është rasti të tregojnë se dinë të bëjnë zgjedhje.
“Pati një fushatë të mbushur me premtime që nuk ishin reale dhe që nuk kanë shumë mundësi për tu mbajtur. Vota e gjithsecilit mund të bëjë diferencë. Të rinjtë duhet të marrin pjesë në votime”,- tha Krasniqi.
Më tej, duke folur për fenomenin e blerjes së votës, ai deklaroi se nëse ‘partitë vijnë sot t’ju kërkojnë votën, t’jua blejnë atë, në fakt nuk po ju blejnë votën, sepse vota nuk është një mall, por po ju blejnë dinjitetin. Nëse sot ju blejnë votën, 4 vitet e ardhshme do të blejnë pronat tuaja’.
Krasniqi bëri thirrje që qytetarët të denoncojnë çdo rast të blerjes së votës, ndërsa shtoi se do të ketë monitorues në të gjithë Shqipërinë.
“Nëse ka kandidatë me të shkuar kriminale, është dita që qytetarët ti largojnë ata nga politika sot me votë. Ne duhet të bëjmë demokraci për të provuar se është sistemi më i mirë që kemi, jo një demokraci nga e cila të zhgënjehemi”,- ishin fjalët e Afrim Krasniqit.
Në vijim ai u shpreh se dita e zgjedhjeve duhet të jetë një ditë normale, jo një ditë jete a vdekjeje.
“Do të jetë një ditë që do të harrohet në kujtesën tonë, ndaj duhet të jetë e qetë”,- tha ai.
Në vijim Z. Krasniqi bëri me dije se për herë të parë zbatohet modeli i dhomës zgjedhore në Shqipëri, e cila do të monitorojë zgjedhjet në të gjithë Shqipërinë, sa i takon cilësisë së votimit, të numërimit, procesi votimit etj.
Ky aktivitet u zhvillua tek Pedonalja e kryeqytetit nga Instituti i Studimeve Politike në bashkëpunim me Ambasadën Amerikane./tesheshi.com/
