Islanda i thotë jo BE-së

Islanda deklaroi se po heq dorë nga kërkesa për t’iu bashkuar Bashkimit Europian, në përputhje me premtimet e bëra dy vite të shkuara nga qeveria e saj e re euroskeptike, bëri të ditur ministri i Punëve të Jashtme.

“BE-ja dhe Islanda kanë diskutuar qëndrimin e vendit mbi statusin e kërkesës për t’iu bashkuar Bashkimit Europian,” thotë deklarata. “Qeveria nuk ka ndër mend të rinisë përgatitjet për anëtarësim në BE.”

Një letër zyrtare që bën të njohur vendimin i është dorëzuar ministrit të Jashtëm të Letonisë, Edgar  Rinkevics. Letonia ka aktualisht presidencën e BE-së.

Vendi nordik aplikoi fillimisht për anëtarësim në BE në vitin 2009, kur drejtohej nga një qeveri e majtë dhe qe tronditur keq nga një krizë ekonomike, duke e bërë një perspektivë tërheqëse anëtarësinë në eurozonë. Por çështja e vështirë e kuotave të peshkimit u pa si një pengesë kyçe, edhe pse ajo nuk u diskutua kurrë në bisedimet e pranimit. Peshkimi është pjesë e rëndësishme e ekonomisë islandeze.

Anketimet po ashtu filluan të tregojnë rezistencë në rritje të islandezëve ndaj anëtarësimit në BE.

Kur Partia e Progresit e qendrës dhe Partia e Pavarësisë e së djathtës erdhën në pushtet në 2013-n i ndërprenë bisedimet me Brukselin, dhe u tërhoqën nga premtimi për të mbajtur një referendum për bashkimin me BE-në.

Gjithsesi, zyrtarët e Islandës janë shprehur se duan të ruajnë “lidhjet e ngushta dhe bashkëpunimin” me Bashkimin Europian.  /tesheshi.com/