Në nisje të Europianit të Francës e në ditët e para të tij shiheshin me kërshëri një numër skuadrash, e mes tyre dhe Shqipëria. Për shumë prej komentatorëve, disa paraqitje të skuadrave jopretenduese ishin vërtet surprizuese.
Por surpriza e vërtetë ka vetëm një emër: është Islanda! Me një popullsi modeste në numër, pa asnjë traditë futbollistike, ekipi kombëtar i Islandës luan një futboll për t’u patur zili. Të disiplinuar, të thjeshtë, të saktë, pa zbukurime, të palodhur gjer në fund, e po ashtu pragmatikë në lojën e tyre. Kështu janë islandezët.
Poshtërim për Anglinë. Kësisoj e përshkruajnë mediat britanike humbjen e mbrëmshme, një humbje që nuk e prisnin as më skeptikët. Aq më tepër pasi Anglia do të kalonte në epërsi që në minutën e katërt, në një nisje të rrufeshme të takimit.
Ja ç’thotë Alan Shearer, ish-sulmuesi e ish-kapiteni: “Kjo ishte paraqitja më e keqe që kam parë nga një ekip i Anglisë.”
Rooney vetë nuk e kishte idenë se çfarë po bënte, thotë një tjetër, duke i vënë notë krejt të pakalueshme kapitenit aktual të anglezëve.
E të mendosh që Anglia kishte boll kohë për ta rimarrë veten. Golat do t’i pësonte në minutën e 6-të dhe të 18-të.
Tërmeti vazhdon tek Anglia. Roy Hodgson jep dorëheqjen, ndërsa pritet nisja e një tjetër cikli të ri. Cikle të reja të ripërsëritura në dekadat e fundit, e që të gjitha të përfunduara në dëshpërim.
Islanda është në qiellin e shtatë pas fitores 2-1 në mbrëmjen e së hënës, si surpriza e vërtetë e këtij kampionati.
Anglia ka prekur sërish fundin, si gjithmonë zhgënjyese pikërisht atëherë kur pritet mrekullia prej saj. /tesheshi.com/
