Një ndër “kështjelljat e rëna” të qëndrimeve apo gjykimeve klishe mbi kahjet politike në Shqipëri, ku ajo çfarë është majtë nuk është dhe aq e majtë e ajo që mbahet për e djathtë është gati aspak e djathtë, është një raport “i ngrohtë” mes elementit musliman dhe PS-së, jo për ndonjë qasje mirëkuptuese të domenit fetar karshi pasueses së PP-së famëkeqe, por më shumë prej kësaj të fundit, me krijimin e një lloj “klime miqësie” ndër vite, duke nisur që me sajdisllëkun në raste Ramazanesh e deri heqjen e çdo lloj pengese kohë pas kohe e vit pas viti që muslimani dhe specifikisht femra me shami, të jetë pothuajse kudo në shtet si e punësuar, pra frenim direktiv apo vetëfrenim psikologjik e frustativ. Pos kësaj, duke mos patur në narrativë politike asnjë shenjë islamofobie.
Ndaj dhe, po të shohësh galerinë fotografike në Facebook-un e Ramës, has në tre xhami me pemë të mbjella afër tyre si dhe në një dyzinë femrash me shami, prezente në tubimet elektorale të PS-së.
Dhe në fakt do ishte Rama ai që, nga fronti i politikës, do kthente vëmendjen te komuniteti musliman(si bashkësi besimtarësh) aty nga mesi i viteve ‘2000, ku më saktë në 2006-ën, si kryetar bashkie, do dërgonte nga një kartolinë urimi për Fiter Bajram te çdo xhami e Tiranës, në të cilën gjendej ajeti kuranor “Dhe pas vështirësisë vjen lehtësim”. Prej atëherë e deri më sot, u vendos një urë afërsie që shkoi drejt shkrirjes së akujve mes një të majte me të shkuar ateiste e një komuniteti që kishte të gjitha arsyet mos ta shihte me sy dygërmëshin që pasonte PP-në e urryer.
Rama nga ana e tij, personalisht, nuk e kishte në CV-në ligjërimore të protagonizmit të tij publik parapolitik përtalljen cinike me fenë, aq më pak me Islamin, ndërkohë që s’kishte kursyer me gjuhën e tij acide asgjë nga
trashëgimia shqiptare, edhe prej atyre që konsiderohen shenjtëri historike apo kulturore. Islami apo muslimanët, në asnjë rast nuk kanë kanë qenë shënjestra të antikonformimit të tij monumental, politik e kulturor, tipar i tij origjinal që do e bënte të famshëm që në vitin 1990. E sot, ndërsa Berisha shpalos edhe më shumë mungesën e lindur një të urtësie në politike, duke u treguar inatçor dhe përfolës i rëndomtë dhe i elementit musliman, ndaj të cilit kurrë nuk ka treguar ndonjë afinitet apo shfaqur sajdisllëk politik, ngjashëm si me çdo domen të së djathtës tradicionale duke menduar se i ka “në xhep”, Rama vijon të zhbëjë një mit ndarjeje mes tij dhe elementit musliman, duke e patur këtë të fundit prezent në të gjitha nivelet e administratës publike e gjithashtu dhe në kabinetin e tij, siç është një femër me shami në rolin e protokollares. Ndoshta jo si zgjedhje e tij por si përkim realitetesh, këtë përafrim të tij me elementin musliman do e kishte që në kohën e të qënit kryetar bashkie, ku disa prej bashkëpuntorëve më të afërt, meshkuj apo femra, do t’i qëllonin besimtarë muslimanë.
Ndaj dhe sot kemi këtë realitet, në dukje paradoksal, ku peisazhet politike të Ramës janë plot islam, përkundër atyre të Berishës pa asnjë prani të ngjashme, ku madje prej tij sulmohet e shahet paq dhe Erdogani, pashmangshmërisht një figurë e madhe politike që përcjell një lloj ndjeshmërie fetare te besimtarët muslimanë në Shqipëri e më gjerë.
Çfarë tregon kjo? Atë që 30 e kusur vitet e paskomunizmit në Shqipëri kanë kthyer kokëposhtë shumë realitetet me tjetër gjykim apo perceptim në 90-ën. Dhe këtu mbërrijmë te Shkodra “shkëmb graniti” me PD-në dhe ndaj PS-së. Nuk është çështja se ajo duhet të votojë PS-në; çështja është që të mos e sheh si virtyt politik atë që në një tjetër këndvështrim është një e metë e madhe: të të mbesë ora në vitet ‘90-të!
Sot, PD e PS duhen gjykuar jo me klishetë e dikurshme, sipas të gjitha atyre që kanë treguar 30 e kusur vite paskomunizëm, ku kurrë s’u kuptua se ku është komunizmi i trashëguar i PS-së e ku anti-komunizmi i pretenduar i PD-së, por me kritere thjesht qeverisëse, ose menaxheriale për ta thjeshtuar, gjeopolitike gjithashtu, ose ekonomike në finale. Këtu po, këtu ka debat, këtu mund të ketë arsye për të mos e votuar PS-në e zgjedhur PD-në, ose e kundërta, por asnjë arsye tjetër naive që vjen era 1990-të. /tesheshi.com/
