Mijëra njerëz janë mbledhur sot në rrugën kryesore të Tashkentit për t’i dhënë lamtumirën njeriut që i qeverisi me dorë të fortë në thuajse tre dekada.
Vargu i makinave mortore ku gjendej dhe trupi i Islam Karimovit e ka përshkuar sot kryeqytetin uzbekistanas, teksa trupi i Islam Karimovi do të dërgohet në Semerkand, në vendlindjen e tij, ku ai do të varroset gjatë ditës së sotme.
Tre ditë zie janë shpallur që me njoftimin për vdekjen e Karimovit. Vetë lajmërimi i vdekjes së tij ka qenë
një histori më vete, pasi gjatë gjithë ditës së djeshme kanë patur lajme kontradiktore. Agjenci të shumta mediatike nuk kanë ditur në duhej ta njoftonin vdekjen e liderit uzbekistanas, ndërsa mungonte konfirmimi zyrtar, që ka ardhur pas shumë orësh.
Karimov vdiq në moshën 78-vjeçare, pasi e udhëhoqi vendin që prej shpalljes së pavarësisë më 1991. Por ai edhe më herët e pati drejtuar vendin ish-sovjetik.
Ai do të rritej në një jetimore në Semerkand, ku edhe lindi, për të studiuar më pas për inxhinieri mekani e shkenca ekonomike. Karimov do të bëhej pjesë e Partisë Komuniste të Bashkimit Sovjetik, duke u emëruar sekretar i parë i saj në Uzbekistan në vitin 1989, kur edhe fillon qeverisjen e vendit.
Çështja e zëvendësimit të tij mbetet ende e paqartë, por si president i ardhshëm sugjerohet se mund të jetë kryeministri aktual, Shevkat Mirzijojev. /tesheshi.com/
