Nga Shkëlzen Rrecaj
Një ISIS kompiuterik është shfaqur së fund, i quajtur “Balena Blu”. Ajo gëlltit mendjet naive të adoleshendtëve, porsi ISIS moleps naivët e të paditurit në besim. Sipas disa të dhënave, vetëm në Rusi 140 fëmijë kanë humbur jetën si pasojë e sfidave që duhet të përmbushin në këtë lojë që çon deri në vetëvrasje. Rasti i parë u shfaq në Shqipëri, për t’u pasuar më pas nga një në Kosovë.
Loja “THE BLUE WHALE GAME” ka 50 nivele dhe në secilin nga ai detyron fëmijët të bëjnë gjera të cilat duhet t’i xhirojnë. Ai nis me kërkesa të të dhënave personale dhe më pas lojtarëve në të u kërkohet të gërvishin duart, të shohin filma horror, të mos flenë gjithë natën derisa në nivelin e fundit, atë të 50, ju kërkohet të bëjnë vetëvrasje.
Sociologët u bëjnë thirrje prindërve të tregohen të vëmendshëm dhe të mos neglizhojnë asnjë shfaqje të ndryshme në sjelljen e fëmijëve të tyre. Loja vdekjeprurëse e “Balenës Blu” nis me sfida tepër të thjeshta.
Sociologia MirilindaVejseli, në një prononcim për tesheshi.com, tha: “Nga informacionet që kemi kjo lojë më tepër prek fëmijët nga mosha 9-15 vjeçe që bën të kuptosh se fëmijët e kësaj moshe lehtë mund të manipulohen. Fëmijët janë pre e lehtë për mendjen e sëmurë të personave që krijojnë lojëra të tilla. Se a ka krijuar loja varësi për fëmijët? Mendoj që po përderisa ato arrijnë në nivele 30-40 të lojës kjo le të kuptosh se fëmijët janë në rrezik në rast se nuk merren masa për të parandaluar pasojat mund të jenë nga më të ndryshmet.”
Më tej ajo theksoi: “Zakonisht këto lojëra të rrezikshme më tepër prekin fëmijët të cilët janë të vetmuar, depresiv, të pa shoqëruar dhe që nuk kanë komunikim të vazhdueshëm me prindërit. Prindërit më së miri njohin fëmijët e tyre në rast se tek ato shohin ndryshim emocional, sjellje të pazakonta, si për shembull të zgjohen çdo ditë më herët se zakonisht, të shohin shenja të pazakonta nëpër krahë, të dëgjojnë muzikë depresive, mos falsin me askënd, janë shenjat që tregojnë se fëmija i tyre është përfshirë në sfidën vdekjeprurëse.”
“Prindërit duhet të bëjnë kujdes të kontrollojnë në mënyrë të vazhdueshme telefonat e fëmijëve të tyre, të mos i lënë vetëm, dhe pse është e pamundur, ti bindin që në mbrëmje ti mbyllin telefonat”, shprehet Vejseli.
Ndërsa sociologu Ferdi Kamberi, për tesheshi.com u shpreh: “Zhvillimi i shoqërisë moderne edhe procesi i globalizmit ka bërë që gjuha si mjetë i komunikimit, të arrijë nga një skaj i botës në skajin tjetër. Këtë e ka mundësuar shkopi magjik i njohur tek ne si “internet”. Përderisa, ky shkop magjik ka bërë që të fuqizohet një komunikim masiv virtual, në anën tjetër ka shumë rreziqe të cilat mund të vijnë si pasojë e një mos menaxhimi adekuat. Rastet e fundit të cilat janë shpërfaq me të ashtuquajturën “balena blu” janë vetëm disa nga ato raste apo rreziqe që bart ky zhvillim i teknologjisë informative. Në këtë drejtim janë edhe një sërë lojërash agresive të cilat po ashtu kanë ndikim jashtëzakonshtë të lartë sidomos tek fëmijët.”
“Mirëpo, së fundi në nivel global ka qenë fokus një lojë e re kompjuterike e cila supozohet se vjen nga Rusia, fjala është për “balenën blu”. Sipas informatave të përgjithshme kjo lojë ka fokus të adoleshentët pasi që ekziston mundësia më e madhe për të manipuluar me ta. Ideja e kësaj loje, gjithnjë sipas informatave që kemi qëndron në faktin se pjesëmarrësit në lojë (adoleshentët) duhet të luajnë një sërë stazash (nivelesh) diku rreth 50 nivele. Fillimisht, nivelet më të ulëta fillojnë prej vizatimeve të balenës me ndonjë gjë të mprehtë në duart e adoleshentëve, pastaj administratori jep urdhra për të shikuar filma të frikshëm dhe për tu zgjuar vazhdimisht në ora 4 -5 të mëngjesit e kështu me radhë deri në nivelin 49-50 që ka të bëjë me vetëvrasjen,” tregon Kamberi.
“Në kontekstin sociologjik, ky fenomen mund të ketë disa orientime: së pari tiparet e kësaj loje të gjitha të dërgojnë tek ndonjë kult fetar satanik i cili në brendësitë e tyre kanë sakrifikime për hirë të idealeve të kulteve, flijime, e të tjera. Raste të tilla ka pasur gjatë gjithë historisë si rasti i Jim Jones ku u vranë mbi 900 persona, Rendi i Tempullit Diellor, e kështu me radhë. Në këtë rast, një gjë e tillë e mund të instrumentalizohet përmes fëmijëve, në mënyrë që ata të jetë objekt i këtyre kulteve. Së dyti, nuk përjashtohet mundësia projektuesit e këtyre lojërave të jetë edhe në kuadër të grupeve anarkike, grupeve të cilat janë të përqendruara në sadizëm dhe mazohizës apo edhe të hakerëve të cilët fitojnë shuma të majme nga kontruktimi i lojërave të tilla,” theksoi Kamberi.
Sociologu Kamberi tregon edhe për rrezikshmërinë që ka kjo lojë dhe pse për organet e shtetit duhej të ishte prioritet.
“Kjo lojë ka një rrezik jashtëzakonisht të lartë dhe konsiderohet se nga organet e shtetit do të duhej të ishte prioritet, sepse mbi të gjitha ka qëllim shpëlarjen e trurit dhe manipulimin me të adoleshentët të cilët janë e ardhmja e këtij vendi. Së këndejmi, rreziqet nga kjo lojë në kontekstin social dhe psikologjik mund të jenë të larta, ndër to: vetë izolim të fëmijëve, varësi nga interneti, probleme me miopi (probleme me sy gjatë qëndrimit të gjatë para pc), shkëputje të normave sociale më familje, agresivitet, promovim të sadizmit dhe masohizmit, probleme me stresin dhe depresionin, mungesë të përqendrimit në shkollim dhe aktivitete rekreative, kulturore dhe sportive, ankth, sëmundje fizike, mungesë të oreksit, e deri tek sjelljet devijante dhe që është më e keqja deri tek vetëvrasja, gjë që edhe qëllimi final i kësaj loje.”
Sociologu Kamberi, po ashtu këshillon prindërit që të kenë kujdes sa më shumë, t’i monitorojnë fëmijët e tyre, shoqërimin e tyre etj.
“Familja konsiderohet si agjens i parë i socializmit dhe si e tillë ka për obligim ligjor dhe moral t’i monitoron fëmijët se si po veprojnë me kënd po shoqërohen dhe me kënd po bisedojnë në rrjetet sociale. Është e qartë se mediat sociale janë prore të globalizmit dhe ato nuk do të mund t’ia ndalojmë fëmijëve, mirëpo, si familje, si prind është etike dhe e rrugës që t’i kenë në monitorim fëmijët, të komunikojnë me ta, t’i kontrollojnë kohë pas kohe dhe t’ua shpjegojnë rreziqet që mund të vijnë jo vetëm nga kjo lojë për edhe rreziqe të tilla.”
“Konsiderojmë se prindërit së bashku me institucionet e vendit dhe operatorët e internetit të cilat janë të legjitimuar në Kosovë, së pari duhet që të krijojnë informacione vetëdijësuese të cilat janë të mirë se ardhura shoqërinë kosovare për rreziqet që bart sidomos kjo lojë, pastaj këta akterë do të duhet që të krijojnë kodime të faqeve ose aplikacioneve në të cilat shfaqet loja e tillë. Kurse prindërit duhet që në vazhdimësi të kenë komunikime me fëmijët e tyre, si dhe t’i monitorojnësjelljet dhe qëndrimet e fëmijëve të tyre gjatë përdorimit të teknologjisë informative”, deklaroi Kamberi. /tesheshi.com/
