Forcat irakene të sigurisë bënë të ditur se militantët e ISIS-it në Mosul, hodhën në erë xhaminë “En Nuri”, një nga më të vjetrat në gjithë Irakun.
Paradoksalisht, kjo xhami, është njëkohësisht vendi ku Lideri i Daish-it, Ebu Bekr El Bagdadi, shpalli për herë të parë, në vitin 2014 “Kalifatin” e tij.
Edhe pse DAESH pretendon që xhamia është shkatërruar gjatë bombardimeve kundër militantëve të saj, një nga oficerët e lartë të ushtrisë irakene deklaroi se forcat e tyre të sigurisë ndodheshin vetëm pesëdhjetë metra larg xhamisë kur militantët e ISIS-it kryen këtë “krim kundër historisë”.
Kjo xhami historike u ndërtua në vitin 1773 a.d nga Nuredin Zengi, Sulltan i dinastisë Sulxhuke pjesë e së cilës ishte në atë kohë Mosuli. Kjo është një nga xhamitë më të vjetra të Irakut që ishte bërë shumë e njohur për shkak të kullës së saj të pjerrët e cila kishte mbijetuar që nga ajo kohë.
Pjesa historike e Mosulit është njëkohësisht pika e fundit në qytet ku militantët e DAESH-it vazhdojnë të luftojnë me forcat irakene të sigurisë të cilat thonë se kanë hyrë në fazën pëfundimtare të operacionit për marrjen e kësaj pjese të qytetit.
Mijëra forca ushtarake dhe të sigurisë së qeverisë irakene, në bashkëpunim me Peshmerga-t kurdë, paraushtarakët arabo-sunitë dhe paraushtarakët shiitë të Irakut, me ndihmën e këshilltarëve ushtarakë amerikanë dhe mbështetjen arjore të SHBA, kanë filluar që nga tetori 2016 një operacion të gjerë për përzënien e militantëve të DAESH-it nga ky qytet.
Gjatë kësaj periudhe janë spastruar pjesët lindore të qytetit, por avancimi në pjesën perëndimore është ngadalësuar për shkak të rrugëve të ngushta dhe përqëndrimit të lartë të popullsisë civile.
Njëkohësisht, Kombet e Bashkuara e akuzojnë DAESH-in se po përdor njëqind mijë banorë të qytetit si mburoja njerëzore. /tesheshi.com/
