Autoritetet greke kanë lajmëruar ditën e shkuar se për herë të parë që prej hyrjes në fuqi të marrëveshjes midis BE-së dhe Turqisë, asnjë refugjat nuk ka vënë këmbën në ishujt grekë të Egjeut.
Ndërsa të hënën patën arritur në këto ishuj 1.662 refugjatë, ky numër zbriti në 600 e 260 përkatësisht të martën e të mërkurën, kurse në 24 orët e shkuara nuk pati asnjë të mbërritur.
Veç marrëveshjes, sipas së cilës Turqia do të kujdeset që ta pengojë vërshimin e refugjatëve drejt ishujve grekë, duket se kushtet e këqija të motit dhe erërat e forta kanë ndikur në ndërprerjen e plotë të karvanit përmes Egjeut.
Marrëveshja, e cila u arrit të premten e shkuar dhe hyri në fuqi të dielën, parashikon kthimin në Turqi të refugjatëve që kanë mbërritur në ishujt grekë.
Për çdo sirian të kthyer në Turqi nga Greqia, Bashkimi Europian do të marrë nga Turqia e do të risistemojë një sirian. Me këtë synohet t’i jepet fund trafikut ilegal të refugjatëve nëpër Egje, e refugjatët sirianë të kurajohen për të qëndruar në kampet turke në pritje të një risistemimi në Europë. /tesheshi.com/
