Orë të vështira po kalon kryebashiaku i Vlorës Dritan Leli, mjeku që në 2015 hoqi bluzën e bardhë për qyrkun e menaxhuesit politik të qytetit të Ramës, por që tani, pas një çarje të thellë me këtë të fundit, po i ngushtohet rrethi si një skemë për ta larguar, ose për t’u vetëlarguar që aty, pa pritur zgjedhjet e pas dy viteve, ku siogurisht as ka gjasë të zgjidhet sërish nga PS.
E fundit, pasi një serie shkrimesh ndaj tij nga eksponentë lokalë të PS-së, Leli ka refuzuar t’i përgjigjet një thirrje të Këshillit Bashkiak për një llogaridhënje në teatrin “Petro Marko”. Arsyeja, masat COVID.
Deputeti socialist Anduel Tahiraj, në një reagim, tha se ato si këshilltarë bashkiake kanë ndjekur me përpikmëri udhëzimet e Ministrisë së Shëndetësisë dhe se mënyra sesi zhvillohet mbledhja e përcakton Këshilli Bashkiak dhe jo Kryetari.
“Në datën 1 qershor rreth 45 këshilltarë kërkuan një mbledhje jashtë radhës me teme komunikim me Kryetarin e Bashkisë për sa u përket problematikave në qytet.
Kryetari i bashkisë refuzoi të paraqitej në këtë mbledhje me pretendimin e respektimit të masave anti-COVID, por kur është një pretendim qesharak pasi i njëjti kryetra pak ditë më parë dha leje për forca të tjera politike që të zhvillojnë mbledhje në këtë sallë”, tha ai.
Më pas kaloi direkt në planin politik.
“Ne i kemi kërkuar në mënyrë të vazhdueshme duke i dhënë mundësinë që të reflektojnë në të mirë të qyteti gjë që nuk ka ndodhur ndaj edhe sot jemi në këtë ballafaqim. Ne si organ i zgjedhur i përfaqësueve të Vlorës kemi përgjegjësinë morale dhe institucionale të mbështesim qytetarët e Vlorës në lidhje me shqetësimet e tyre. Kryetari i bashkisë së Vlorës ka humbur mbështetjen e PS-së edhe besimin e qytetarëve të Vlorës. Kjo na ka bërë që ne të marrim në dorë fatet e qytetit”, arsyetoi deputeti.
Pasoi reagimi i Lelit duke thënë se “kërkesat dhe insistimet e vazhdueshme për mbledhje në ambientet e mbyllura janë në kundërshtim me rregullat për pandeminë”.
“Në respektim të rregullave mbledhja duhet të zhvillohet online. Më vjen keq edhe në këtë rast të mbledhjes online që këshilltarët bashkiak nuk janë paraqitur, ne kemi përgatitur informacionin e nevojshëm dhe ia kemi çuar në zyrë çdo këshillitari bashkiak për pyetjet e tyre të ngritura“, pretendoi kryebashkiaku i Vlorës, i shndërruar në hasëm me partinë e tij, për arsye të paqarta. /tesheshi.com/
