Deri para 30 vitesh aty pihej ujë. Ndërsa sot…aty të vjen ndot dhe të urinosh!
Është kjo situata prej disa javësh në tërë gjatësinë e lumenjve Zezë dhe Ishëm, ku ndotja e pisllëku ka dëmtuar rëndë edhe fermerët e zonës. Është katandisur kështu gjendja pas shirave të rrëmbyeshëm të javëve më parë, ku këty dy lumenj që përcjellin edhe ujin e Lanës së ardhur nga Tirana, dolën nga shtrati dhe përmbytën me qindra hektarë tokë.
Uji u tërhoq, toka u tha, por ajo çfarë mbeti më pas ishte po aq e tmerrshme sa dhe përmbytjet, si dhe dëmtuese e të mbjellave, prodhimit, për të cilin fshatarët e zonës, përgjithësisht ata të Fushë Krujës dhe Mamurrasit kanë mbetur me gisht në gojë.
Në fakt, një e tillë pamje nuk është dhe aq e pazakontë në Shqipëri, sa herë ndodhin përmbytjet. Ndotja ambientale në të tilla raste shfaqet me përmasën e vetë reale, duhet thënë e frikshme.
Dalin në sipërfaqe ç’ka mos që hidhet kudo dhe që tregon si shteti e shoqëria bashkë kanë shumë probleme. Ky pisllëk i përmasave të tilla pasqyron kaosin tonë disavjeçar, zhveshjen nga çdo lloj etike e të jetuarit, duke i bërë vetes atë që asnjë armik ndër shekuj nuk na e ka bërë. /tesheshi.com/
