Një zhvillim interesant ka ndodhur mbrëmjen e të martës në politikën maqedonase, posaçërisht atë opozitare. Një ndër ish-eksponentët më të vlerësuar të BDI-së, ish-deputet i kësaj partie i dorëhequr një vit e gjysëm më parë, Arben Llabënishti, është zgjedhur n/kryetar Besës me unanimitet të plotë.
Kalimi i Llabënishtit tek Besa është një ndër lëvizjet më impresionuese në politikën maqedonase. Në zgjedhjet e fundit lokale, Llabënishti kandidoi për kryetar komune në Strugë, por më parë ai dha dorëheqjen nga të qënit deputet, krejt vullnetarisht dhe pa asnjë detyrim, çka befasoi opinionin për mirë me këtë akt etik. Ai ka mbajtur dikur dhe postin e z/ministrit të Mbrojtjes dhe nuk është përfolur kurrë për ndonjë aferë.
Kalimi i Llabënishtit nga BDI tek Besa, llogaritet si një ndër goditjet e rënda që merr partia e Ali Ahmetit pak para nisjes së fushatës elektorale për zgjedhjet e 11 dhjetorit në Maqedoni. Risia më e madhe e këtyre zgjedhjeve është Lëvizja Besa, e cila për momentin gëzon një kartë të fortë morale në elektoratin shqiptar krahasuar me dy partitë e tjera, BDI dhe PDSH. /tesheshi.com/
