Siç Piramida, edhe ish-vila e Enver Hoxhës në Bllok do ketë tjetër funksion, të palidhur me kontekstin e të kaluarës komuniste.
Ndërsa ish-muzeu komunist i ish-diktatorit krah Kryeministrisë është bërë qendër teknologjie, vila ku ai kaloi vitet e jetës nën regjimin që vetë e drejtoi do jetë një qendër arti.
Kjo u kumtua në një ceremoni me praninë e presidentit Macron, ku Rama dha këtë shpjegim: “Nuk po fshijmë të kaluarën, po e shndërrojmë në burim energjish për ta nxjerrë më mirë në pah lirinë e shprehjes, për ta konsideruar me më shumë respekt e admirim faktin e të jetuarit në një hapësirë lirie”.
Ndërsa vartësja e tij, ajo e Kulturës, Elva Margariti, përdori këtë lloj sofizimi: “Ne jemi të gjithë të paduruar ta perjetojmë kohën kur kjo vilë të mos quhet me ‘vila e Enverit’ por ‘vila e artit’, për të gjithë ne. Në këtë shtëpi paradoksesh, ne sot i hapim rrugën edukimit të brezit të ri me artin”.
Arsyeja se pse ishte dhe Macron në ceremoni, ka të bëjë me faktin se qendra e artit do mundësohet nga fondacioni francez “Art Explora”. /tesheshi.com/
