Nga Bardha Nergjoni
Ndër shërbimet e shumta argëtuese që ofrohen ambienteve të plazheve, është dhe ajo e qitjes. Dikush, kundrejt një pagese, të ofron një pushkë e një objektiv, ku pas shënjestrimit provon aftësinë e të qëlluarit në shenjë, e nëse ia qëllon, kënaqsinë e të goditurit “në lule të ballit”. Këtë shërbim, këtë qitje ambulatore, e ofron dhe Hysen Gjoka nga Dibra, një ish-ushtarak, që duket sikur profesionin e tij e ka adaptuar për të fituar të ardhura. Dhe një gjetje që ka bërë për të joshur klientët, është fotografia e Millosheviçit në objektivin që duhet shënjestruar dhe qëlluar më pas. Kjo, kur duhet se kosoarët përbëjnë dhe kontigjentin e madh të plazheve tona. E ka vendosur foton qysh nga vjeshta dhe shpreson që këtë verë me shtimin e plazhistëve të bëjë pak para me këtë lloj shënjestre të rrallë. I kanë propozuar të vendosë edhe atë të kryeministrit apo ish-kryeministrit, pra Berishës apo Ramës, por me ata ka vendosur të mos ngatërrohet.
Pse vendosët si shenjestër edhe Millosheviçin?
Kam mbi 5 vjet që kam vendosur këtë lojë në plazh. Nga vjeshta kam vendosur edhe fotografinë e Millosheviçit. E pashë në një vend tjetër që e gjuanin dhe e mora e fotokopjova. Ai i vdekur, kështu që nuk ka ndonjë problem se e gjuajnë. Kam parë që tërheq e shpresoj që në verë të ketë më shumë klientë tek kjo lojë.
Keni vendosur fytyra të tjera si shenjestër?
Jo. Më kanë thënë të vendos Ramën apo Berishën, po mua s’më kanë lënë mendtë të vendos ata e të vijnë të më kërkojnë llogari. Unë jam ushtarak dhe i di mirë këto punë. Kam punuar në ushtri në Peshkopi e më pas kam ardhur këtu. E them se s’dua të ngatërrohem sepse e kam pasur një histori me këtë gjë. Kur punoja në ushtri desh e kam pësuar prej fotografive. Unë merresha me organizimin e një dreke në ushtri kur bëhej inagurimi i brigadës. Ndërsa hapja gazetat në tavolina si mbulesë për të shtruar drekën, në faqet e gazetave ishin udhëheqësit e kohës. Për këtë gjë vijnë të sigurimit dhe më thonë të kem kujdes dhe i heqin. Mund të përfundoje dhe në burg për këtë gjë në atë kohë. Prandaj them që s’ngatërrohem se të zë belaja kot edhe sot.
Nga ushtarak përfunduat tregëtar këtu në plazh?
Kam punuar edhe disa vite në kohën e demokracisë dhe më pas dola në rezervë. Deri para pak vitesh kishim pension më të mirë. Tani është shumë i vogël e nuk mjafton. Kam katër a pesë vjet që dal këtu, pasi kam fëmijët për të rritur e duan shkollë e para. S’kam çbëj do bëj një punë tjetër për të shtuar ca lekë në shtëpi. E kështu dola në plazh për të tregtuar se çfarë mund të bëj tjetër unë. Përgatita edhe këtë armë, e fitoj 50 lekë për tri gjuajtje.
Fitoni mirë me shitjet dhe me këtë lojë?
Tani njerëz ka, por nuk është se shpenzojnë. Kështu që jemi të detyruar edhe të vendosim fotografi apo gjëra të tilla për të tërhequr njerëzit. Çfarë të bëjmë tjetër? Shpresojmë që kjo verë të jetë e mbarë për të gjithë, por sidomos për ne që e presim me aq shumë interes. Si unë ka shumë të tjerë që nga halli dalin këtu. Derisa të na lenë këtu do vazhdojmë. /tesheshi.com/
