Sven-Goran Eriksson, jo shumë vite më parë njëri prej trajnerëve më të kërkuar në futbollin europian, ka marrë drejtimin e një ekipi kinez që nuk gjendet në kategorinë superiore të këtij vendi.
Ish-trajneri i Anglisë, i Mançester Sitit e i Lacios, mes shumë ekipeve të tjera, do të zërë vendin e Clarence Seedorf-it te Shenzhen FC.
“Përvoja e pasur në trajnim, filozofia e përparuar e futbollit, si dhe njohja nga afër e futbollit kinez,” janë arsyet që e kanë bërë klub të punësojë si trajner një emër si Sven-Goran Eriksson.
Suedezi vetëm një muaj më parë u largua nga Shanghai SIPG, një ekip i Superligës kineze, të cilin ai e drejtoi për dy vite.
Pozitat e ekipit të ri të Eriksson-it nuk janë aspak të mira, pasi Shenzhen renditet në vend të nëntë mes 16 skuadrave të kategorisë së dytë kineze. /tesheshi.com/
