Ish-të burgosurit politikë të Kosovës, duke përkujtuar 37-vjetoritn e demonstratave të marsit ’81, kanë kërkuar nga institucionet që të miratohet ligji për Lustracion (ligj që do të spastronte drejtësinë nga të gjithë të implikuarit në ngritjen e gjyqeve false ndaj shqiptarëve).
Një nga organizatorët e protestës së 81-shit, Binak Ulaj kritikoi sistemin e drejtësisë kosovare, ndërsa tregoi pse nuk po miratohet ky ligj.
“Ligjin nuk mund ta nxjerrin ata të cilët e vetë janë korruptuar sot. Jemi dëshmitarë e cekët edhe aty se sot në vend të ligjit të së drejtës e kemi një shtet jo ku sundon ligji por një shtet politik ku vendosin grupet e caktuara”, tha Ulaj, në tryezën që u organizua të dielën me temë “Drejtësia tranzicionale në Kosovë, ligjet për Lustracionin”, të organizuar nga Shoqata e të Burgosurve Politik të Kosovës, Lidhja e Juristëve të Kosovës dhe Shoqëria “Lëvizja”.
Kurse kryetari i shoqatës “Lëvizja”, Xhevat Bislimi, tha se me inicimin e ligjit në fjalë nuk synojnë ta dënojnë askënd, por të mos lejojnë të bëjnë drejtësinë ata persona që dënuan shqiptarët paraluftës.
“Ne nuk kemi ndërmend as si shoqatë e as si shoqëri civile që të iniciojmë diçka për të dënuar njerëz për hakmarrje, por kjo është që të parandalohet rikthimi i njerëzve që vërtetë janë përgjegjës për dhunën”, tha Bislimi.
Përvec ish-të burgosurve, edhe Këshilli për Mbrojtjen e të Drejtave të Njeriut ka adresuar kohë më parë një kërkesë në Ministrinë Drejtësisë nga e cila kërkon që të hartojë ligjin për Lustracion. Kjo nismë e KMDLNJ-së është përkrahur edhe nga disa deputetë të Kuvendit të Kosovës, si Nait Hasani i PDK-së, Haxhi Shala i NISMA-s etj, por deri më tani nuk ka asgjë konkrete. /tesheshi.com/
