Në të parën shfaqje publike që prej lënies së detyrës në qershor të këtij viti, Tamir Pardo, ish-shefi i Mossad-it, ka deklaruar se krijimi i një shteti të pavarur palestinez është me rëndësi vendimtare për paqen në Lindjen e Mesme.
Me këtë deklaratë, ai u bashkohet shumë kolegëve të tij të dalë në lirim që kanë kërkuar prej qeverisë izraelite që të kërkojë një zgjidhje me dy shtete.
I gjendur në një aktivitet në veri të vendit, Tamir Pardo ka thënë se nuk beson që Izraeli mund të arrijë marrëveshje me botën arabe pa zgjidhur çështjen palestineze.
“Nuk do të jemi kurrë në gjendje të arrijmë normalizimin me fqinjët tanë arabë pa një zgjidhje diplomatike të konfliktit izraelito-palestinez.”
Ish-shefi i Mossad-it vuri në dukje se kryeministri Benjamin Netanyahu e ka mbështetur idenë e pavarësisë palestineze, dhe i bëri thirrje atij të vijojë në atë rrugë.
Tamir Pardo ka përmendur si kërcënim të afërt për vendin e tij polarizimin në rritje brenda shoqërisë izraelite.
Sipas tij, përçarja e brendshme mund të çojë në luftë civile. “Nëse një shoqëri kapërcen një vijë të caktuar në urrejtjen dhe ndarjen e saj, atëherë ka një mundësi reale për të parë një fenomen si lufta civile.” /tesheshi.com/
