Nga Saimir Sulaj, Washington
Ish-drejtori i FBI-së James Comey deklaron se Presidenti amerikan Donald Trump është nën hetim nga prokurori special për çështjen e ndërhyrjes së Rusisë në zgjedhjet e 2016-ës Robert Mueller, nëse ka penguar drejtësinë apo jo. Comey e tha këtë në dëshminë e tij përpara Komitetit të Inteligjencës në Senatin amerikan, për çështjen e ndërhyrjes së rusëve në fushatën zgjedhore, siç dyshohet në favor të kandidatit republikan atëherë, sot Presidentit Trump.
Comey tha se nuk i takonte atij që të thotë nëse kërkesa që iu bë nga Trump që të ndalonte së hetuari ish-këshilltarin e sigurisë së Trump, Michael Flynn, për kontaktet e fshehta që ai ka pasur me zyrtarë rusë, ishte pengim i drejtësisë nga ana e Presidentit, por se është i sigurt se prokurori special Mueller po merret me këtë çështje.
“Nuk mendoj se më takon mua që të them nëse biseda që pata me Presidentin ishte një përpjekje e tij për të penguar drejtësinë. Por jam i sigurt se Mueller po merret me këtë çështje” – u shpreh Comey.
Në dëshminë e tij, nën betim, para Senatit, Comey përmendi të paktën dy herë se Presidenti Trump është gënjeshtar. Ai tha se me shkarkimin e tij nga detyra e drejtorit të FBI-së, Shtëpia e Bardhë poshtëroi atë dhe vetë FBI-në.
“Ato ishin gënjeshtra, dhe kjo është shumë e thjeshtë. Më vjen keq që punonjësit e FBI-së duhet t’i dëgjonin ato gënjeshtra. Më vjen keq gjithashtu që qytetarët amerikanë duhet t’i dëgjonin ato gënjeshtra.”, – tha Comey para senatorëve.
Presidenti Trump e shkarkoi nga detyra ish-shefin e FBI-së James Comey para një muaji, vetëm pak ditë pasi institucioni që ai drejtonte kishte nisur një hetim edhe ndaj dhëndrit të Trump, këshilltarit të tij Jared Kushner, për biseda të dyshimta me zyrtarët rusë. Ndaj gjithë kësaj çështjeve që ka hapur shumë debat në SHBA, pra ndërhyrjes së rusëve në fushatën presidenciale të 2016-ës në favor të Trump, ka nisur një hetim i gjerë nga prokurori special i caktuar për këtë gjë, Robert Mueller./tesheshi.com/
