Ish-presidenti amerikan, Xhimi Karter paralajmëroi se politika amerikane është korruptuar nga miliarda dollarët e financimeve në fushatë. Komentet vijnë pas vendimit të gjykatës së Lartë amerikane që, sipas tij, legalizoi “rryshfetet”.
Duke folur për zhvillimet aktuale, Karter e cilësoi vendimin e njohur të vitit 2010, që barazoi shpenzimet e fushatave me lirinë e fjalës, si një “vendim të gabuar”.
Pas votimit në Iowa, për të cilin kandidatët republikanë shpenzuan 43 milionë dollarë në reklama televizive dhe kandidatët demokratë shpenzuan 16.8 milionë dollarë, Karter tha se dominimi i parave në politikë përfaqëson ndryshimin më të madh që nga koha kur ai u zgjodh president në vitin 1976.
Në intervistën me programin “Today” në Radio 4 të BBC, Karter analizoi situatën në këtë vit elektoral: “Unë nuk kisha para. Tani ka një injektim masiv të qindra milionë dollarëve në fushata për të gjithë kandidatët. Disa kandidatët si Trump mund të përdorin paratë e tyre, por të tjerët duhet të jenë në gjendje të mbledhin 100 deri në 200 milionë dollarë që të mund të jenë të nominuarit, republikanë apo demokratë qofshin. Ky përbën ndryshimin më të madh në Amerikë”.
Pa e përmendur me emër, ai fajësoi vendimin e kolegjit të Qytetarëve që hapi rrugën për mjetet e financimit që shumë druajnë se po përdoren nga biznesi i madh për të blerë ndikim politik.
Karter tha: “Vendimi i gabuar i gjykatës së Lartë, me anë të të cilit milionerët, miliarderët mund të financojnë sasi të pakufizuara parash, bëjnë që rryshfeti i ligjshëm të mbizotërojë, për shkak se të gjithë kandidatët, pavarësisht nëse janë të ndershëm ose jo, pavarësisht nëse janë republikanë apo demokratë, varen nga këto injektime masive të parave nga më të pasurit në mënyrë që të kenë para për të bërë fushatë”.
Ish-fermeri i kikirikëve që u zgjodh president demokrat i Amerikës pretendoi se amerikanëve të klasës së mesme dhe punëtorëve “po iu hiqet me mashtrim mundësia për të përmirësuar shumëçka në jetët e tyre”.
“Ndërsa njerëzit e pasur financojnë fushatat, kur kandidatët marrin detyrën ata bëjnë atë që duan njerëzit e pasur. Dhe kjo gjë bën që të pasurit të bëhen akoma edhe më të pasur ndërsa klasa e mesme të lihet mënjanë. Të gjitha statistikat tregojnë se klasa e mese është në stanjacion ose po i përkeqësohet situata e të ardhurave për punën që bën”.
Karter shtoi: “Kur unë kandidova kundër Gerald Fordit apo më pas, edhe kundër Ronald Reganit, ne nuk mblodhëm asnjë cantim për të financuar fushatat tona kundër njëri-tjetrit…në ditët e sotme duhet të kesh qindra milionë dollarë për të dalë përpara të tjerëve”.
Në intervistën që mbuloi një spektër të gjerë çështjesh, ish-presidenti Karter foli edhe për fushatën e suksesshme të bamirësisë për të zhdukur sëmundjen e krimbit guinea në vendet afrikane.
Ai foli edhe për betejën e tij me kancerin, duke thënë: “Kur njoftova disa vjet më parë se isha me kancer, thashë se shpresoja të mbijetoja ndaj krimbit të fundit guinea… Jam gjithnjë optimist. Kam pasur një sëmundje të tmerrshme, që po e luftoj tani, me gjasa suksesshëm. Kam ende një jetë të mirë dhe jemi në prag të zhdukjes së krimbit guinea dhe kjo është një gjë inkurajuese”. Përgatiti: Juli Prifti – /tesheshi.com
