Një politikan i lartë serb deklaroi se Beogradi duhet të ndalojë zbardhjen dhe dënimin e vrasësve të vëllezërve Bytyqi, pasi SHBA-të kanë vrarë dy diplomatë serbë në një bombardim ajror në Libi.
Ish-presidenti i Serbisë, Predrag Markoviç, i cili ka qenë edhe kryetar i Parlamentit, i kërkoi qeverisë që të mos e pranojë presionin e Shteteve të Bashkuara të Amerikës për çështjen “Bytyqi”.
“Në qoftë se vrasja e dy diplomatëve serbë në Libi është një gabim amerikan, siç po cilësohet, atëherë pse ky kriter nuk zbatohet në rastin ‘Bytyqi’,” thotë Markoviç, një nga drejtuesit kryesorë të partisë në pushtet, të drejtuar nga kryeministri Aleksandër Vuçiç.
Ky është një kushtëzim cinik, pasi Mehmet, Agron dhe Ylli Bytyqi u arrestuan, u torturuan dhe u
masakruan në korrikun e vitit 1999 ndërsa po ndihmonin një familje rome që të linte Kosovën dhe të shkonte në Serbi. Dhe duke qenë se ky përbën një krim kundër njerëzimit, SHBA-të kanë vënë kusht që Beogradi t’i dënojë fajtorët.
Por ish-presidenti serb shkon edhe më tej në teorinë e tij. Ai kujton bombardimin e NATO-s në ambasadën kineze në Beograd në vitin 1999, që u cilësua si “gabim shënjestre”. Mirëpo, realisht, në atë seli diplomatike ishte vendosur qendra e komandimit elektronik të ushtrisë serbe.
Për ish-drejtoreshën e Qendrës për të Drejtën Humanitare, një nga veprimtaret e njohura, Natasha Kandiq, të dy rastet nuk mund të krahasohen.
“Eshtë e papranueshme krahasimi i njerëzve që humbën jetën e tyre në një incident, çka është tragjedi,me vrasjen gjakftohte. Kjo nuk mund të krahasohet me viktimat e luftës, dhe vrasja e vëllezërve Bytyqi ishte një krim,” ka thënë Kandiç për radion B92.
Kandiq shpjegon se, “amerikanët nuk kushtëzojnë me rastin Bytyqi, por na inkurajojnë për të ndërtuar shtetin e së drejtës”. Ajo thekson se mesazhi që vjen nga maja e Partisë Progresive Serbe, pra, e partisë në pushtet, me siguri do të shkaktojë një reagim të Ambasadës Amerikane.
“Gjëja më e sikletshme në deklaratën e Markoviçit është fraza se një pjesë e mirë e qytetarëve këtu mendojnë si ai, që do të thotë se meqë vëllezërit Bytyqi ishin pjesëtarë të UÇK-së, atëherë kemi bërë mirë që i kemi vrarë. Ky opinion është shumë i përhapur, dhe kjo është për shkak të propagandës të fortë që nuk ka ndaluar në Serbi,” ka shtuar Kandiq.
I menjëhershëm ka qenë reagimi i ish-presidentit serb. “Ajo mund të ketë të drejtë, por kjo nuk do të thotë se njerëz si Natasha Kandiq duhet të mbrojnë me entuziazëm çdo vrasje të kryer nën kujdesin e administratës amerikane,” është shprehur prerë Markoviç. /tesheshi.com/
