Ish-kreu i LDK-së, njëherësh ish-presidenti i Kosovës Fatmir Sejdiu, e quan humbje rzultatin e partisë së tij në zgjedhjet e 6 tetorit, edhe pse ajo po bëhet gati të bashkëqeverisë me VV-në si forcë e parë. LDK doli forcë e dytë, e këtë Sejdiu e konsideron humbje.
“Nuk duhet të shkohet në vazhdimësi duke humbur zgjedhjet dhe mos të ketë reflektim karshi tyre”, tha Sejdiu në një intervistë për KosovaPress, duke shtuar se “duhet të ketë një analizë të mirë. Ata që kanë faje të caktuara duhet të jepet përgjegjësia për to, sepse nuk shkohet në vazhdimësi të humben proceset zgjedhore dhe pastaj të ketë një kapërcim shumë të lehtë karshi tyre”.
Megjithatë, ai është pro një bashkëqeverisjeje me VV, por duke thënë se në fokus duhet të jetë Kosova e jo interesat partiake.
“Unë dua të besoj në interesin e Kosovës që duhet të jetë më së miri. Nëse këto duan të hyjnë në koalicion duhet të kenë parasysh edhe nuanca të mëdha. Flas ato që duhen të jenë pikë e përbashkët qeverisëse janë interesi i vendit dhe qytetarëve”, theksoi paraardhësi i Isa Mustafës. /tesheshi.com/
