Herman Van Rompuy, ish-presidenti i Këshillit Europian, është i mendimit se mes Mbretërisë së Bashkuar dhe pjesës tjetër të BE-së nuk ka gjasa të zhvillohen bisedime të qenësishme gjatë 12 muajve në vijim.
Ai ka folur për BBC-në, duke u shprehur se negociatat nuk pritej të fillonin para formimit të një qeverie të re gjermane pas zgjedhjeve të shtatorit të ardhshëm.
“Unë mendoj se nuk do të ketë negociata serioze para zgjedhjeve në Gjermani dhe para se të ketë një qeveri të re gjermane. Mund të filloni me çështje teknike, por temat e vështira do të diskutohen pas formimit të një qeverie të re gjermane.”
Çdo negociatë do të jetë e vështirë, sipas tij.
“Sigurisht, ne duam një marrëveshje që të përfaqësojë një lloj përfitimi të ndërsjelltë. Ka interesa të mëdha ekonomike, por ka gjithashtu vija të kuqe,” ka thënë Van Rompuy për një program radiofonik të BBC-së.
Britania duhet ta bëjë lëvizjen e parë, ka qenë sugjerimi i ish-presidentit të Këshillit Europian.
Në një referendum në qershor të këtij viti, britanikët votuan për largimin nga BE-ja.
E ardhmja e unionit do të jetë në qendër të diskutimeve sot në Bratislavë, në një takim të udhëheqësve të vendeve të BE-së. /tesheshi.com/
