Ish-presidenti i Brazilit, Luiz Inacio Lula Da Silva ka përfunduar në burg pas një gjyqi ku akuzohet për korrupsion.
Ai është dënuar me 12 vite burg mbi akuzat për mitmarrje, por Lula pretendon se akuzat janë të motivuara politikisht dhe synojnë të pengojnë kandidimin e tij në zgjedhjet presidenciale të tetorit.
Sondazhet sugjerojnë se Da Silva është kandidati favorit për të fituar garën. Gjykata e Lartë vendosi kundër tij pas një seance maratonë që përfundoi në orët e para të së enjtes.
Ish-presidenti 72-vjeçar pritet të qëndrojë i lirë për një periudhë të shkurtër kohe, deri sa të përgatiten dokumentet për arrestimin e tij.
Partia e Punëtorëve e ish-liderit tha se “kjo ishte një ditë tragjike për demokracinë në Brazil”.
Gjykata e Lartë shqyrtoi një vendim të 2016-ës nga një gjykatë më e ulët, mbi bazë të së cilës të akuzuarit mund të burgosen pas dështimit të apelimit të parë.
Presidenca e Lula Da Silva zgjati nga 2003 deri në 2011-n. 20 mijë persona protestuan në Sao Paulo të martën duke kërkuar burgosjen e tij të menjëhershme, ndërsa mijëra mbështetës të tij zhvilluan një manifestim paralel. /tesheshi.com/
