I emëruar guvernator i Odesës në muajt e parë të vitit të kaluar, Mikheil Saakashvili ka dhënë dorëheqjen. Ai e ka akuzuar presidentin ukrainas se i mbështet zyrtarët e korruptuar. Ish-presidenti i Gjeorgjisë tha se ata po ia minonin përpjekjet për reforma në rajonin ukrainas të Odesës.
Dorëheqja e tij pason atë të shefit të policisë së Odesës, Giorgi Lortkipanidze, gjithashtu një gjeorgjian.
“Presidenti po mbështet personalisht dy klane në rajonin e Odesës,” është shprehur ai për Petro Poroshenko-n, duke i quajtur këto klane kriminale dhe të korruptuara.
“Kjo po bëhet krejt hapur. Rajoni i Odesës nuk po u lihet në dorë vetëm njerëzve të korruptuar, por gjithashtu armiqve të Ukrainës. Jam i lodhur dhe i ligështuar nga e gjitha kjo. Prandaj, në këtë situatë, vendosa të dorëhiqem dhe të nis një fazë të re të betejës,” ka qenë fjalët e dorëheqjes së Saakashvili-t.
Ish-presidenti i Gjeorgjisë do të zhvendosej në Ukrainë pas mbarimit të mandatit presidencial tre vite më parë, ku ka marrë dhe shtetësinë ukrainase.
Një kritik i ashpër i Vladimir Putin-it, Mikheil Saakashvili është akuzuar për abuzim me pushtetin, diçka që ai e ka mohuar prerë. /tesheshi.com/
