Luiz Inacio Lula da Silva, ish-presidenti i Brazilit në vitet 2000, u shfaq sfidues në një fjalim të mbajtur vetëm pak orë pasi u ndalua nga policia për t’u marrë në pyetje në lidhje me akuzat për korrupsion.
“Nëse ata duan të më mposhtin,” iu referua ai kundërshtarëve të tij, “do të përballen me mua në rrugët e këtij vendi.”
Fjalimi i tij para qindra mbështetësve në Sao Paolo pati dhe nota melankolike, teksa Lula 70-vjeçar u përlot kur kujtoi se si i nxori nga varfëria miliona brazilianë gjatë kohës që qe president.
Ai nuk u arrestua, ashtu siç u lajmërua më herët, por u ndalua nga policia për t’u dhënë përgjigje një sërë pyetjeve që kanë të bëjnë me skandalin e shpërthyer të korrupsionit, ku lakohet dhe emri i tij.
“Autoritarizëm gjyqësor” e quajti ai vendimin për ta marrë forcërisht për ta pyetur. “Nëse dëshironin të më dëgjonin, mjaftonte të më thërrisnin dhe do të kisha vajtur, sepse nuk i frikësohem askujt dhe asgjëje. Ata parapëlqyen të tregojnë pushtet, arrogancë, të bëjnë shfaqje,” deklaroi Lula në një konferencë shtypi pak pasi u la i lirë.
Ish-presidenti Lula është ende një ndër figurat më të rëndësishme dhe më me ndikim në Brazil, i mbështetur gjithashtu dhe nga presidentja aktuale, Dilma Rousseff.
Lula akuzohet për përfshirje në një skemë korruptive, e për përfitime parash e shtëpish banimi. /tesheshi.com/
