Ish-njeriu i LDK-së në Gjermani, Emrush Qeku, shpalli në krijimin e partisë më të re në Kosovë, atë që do të quhet Partia Demokratike e Diasporës.
“Urojë që Partia Demokratike e Diasporës, të arrij të vë në pah rëndësinë e mërgatës politike e patriotike të Kosovës!
Mërgatës e cila është shfrytëzuar maksimalisht nga partitë politike vendore.
Asaj mërgate e cila së fundi u la pas dore u injorua deri në atë shkallë sa ngjall keqardhje.
E si pasojë, lind edhe pyetja e shumë arsyeshme: Pse i kemi ndihmuar ato parti të cilat atë kohë e quanin vetën, kombëtare?”, e nisi ai fjalën përshëndetëse në ceremoninë e prezantimit të forcës më të re, e cila, duke qenë e profilizuar të masa e madhe e atyre që në Kosovë quhen ndryshe dhe si gurbetçarët, pra diaspora, do tentojë votat e këtyre të fundit.
“Ne kemi një mijë e një argumente nga e kaluara, të cilat na shtyjnë të jemi të pakënaqur me gjendjen aktuale dhe neglizhimin e faktorit politik të mërgatës. Duke filluar nga puna e madhe që ka bërë mërgata patriotiken, në kohën kur vendit i duhej ndihma e saj. Është fakt i cili dihet mirëfilli. Por siç duket ka ardhur koha që i gjithë ai angazhim i yni të përmendet e të përseritet shpesh. E gjitha me synim që tu rikujtohet harrestarëve të qëllimshëm.
T’u kujtohet se mërgata ka qenë faktori gjenerues e kryesorë i lirisë dhe pavarsisë së Kosovës. Mërgata ka qenë ajo nëna e pagjumë që nuk ka gjetur rahatin askund kur fëmija i ka lënguar i sëmurë. Apo fëmija që ka ndenjur zgjuar mbi kokën e sëmurë të nënës. Shpesh shkojmë larg me gjykime e veprime pa e shikuar bazën e një dukurie.
Mërgata është pjesa e një Atdheu e Atdheu është kudo ku ka mërgimtarë. Mjerisht mërgata patriotike e Kosovës, përjetoi përjashtimin total nga pjesëmarrja në proceset e vendimmarrjes politike të vendit”, tha njeriu i cili në vitet e vështira të sundimit serb është angazhuar dhe me 3-përqindëshin e solidaritetit të qeverisë së Bujar Bukoshit në ekzil. /tesheshi.com/
