Për Wolfgang Petritsch, ish-i dërguari i posaçëm i BE-së për Kosovën në vitet ’98-’99, njëherësh dhe shefi negociator i BE-së në bisedimet paqësore të Kosovës në Rambuje dhe Paris, projekti amerikan për rinisjen e dialogut Prishtinë-Beograd, mund të konsiderohet i vdekur.
“Momentalisht iniciativa amerikane është e destinuar për të vdekur. Gjëja më e rëndësishme është që të motivohen të dyja palët, duke krijuar një situatë kur të dyja anët fitojnë. Ajo mund të arrihet në aspektin politik, ekonomik, apo përmes diskutimit për territore. Mirëpo për këtë të fundit janë ngritur pikëpyetje nga gjermanët, francezët dhe shumë të tjerë, përfshirë edhe në brenda vetë këtyre dy vendeve. Nuk e di cili mund të jetë rezultat final, por po them që ndërmjetësimi duhet të ndodhë në atë mënyrë që rezultati të jetë i hapur”, tha Petritsch në një intervistë për REL.
Sipas tij, tashmë është momenti që BE të marrë rol në bisedime për një marrëveshje mes Kosovës dhe Serbisë.
“Tani është më e rëndësishme që të fokusohemi në situatën e re të krijuar, të shohim se çfarë mund të bëhet, pasi besoj se (i dërguari i BE-së për dialogun, Mirosllav) Laçjak tani ka një mundësi fantastike që të paraqesë rregullat evropiane përgjatë ndërmjetësimit, dhe që të dyja palët, Beogradi dhe Prishtina, të arrijnë pajtueshmëri”, tha diplomati i njohur.
Në gjykimin e Wolfgang Petritsch, europianët gjuthsesi s’duhet të bëjnë gabimin e SHBA që desh t’i anashkalonte në rol.
“Tani është e qartë se evropianët kanë përpara një mundësi të papritur për t’u kthyer sërish në rolin udhëheqës në këtë çështje. Unë do të paralajmëroj Brukselin që të mos niset pa amerikanët. Ndoshta tani do të jetë jashtëzakonshme e vështirë për të bashkëpunuar me Grenellin dhe Trumpin, mirëpo në periudhë afatgjatë, sidomos pas nëntorit, evropianët duhet të përfshijnë sërish amerikanët në këtë proces”, tha ai.
Por për Petritsch, në proces duhet të përfshihen dhe dy pole të tjera.
“Frikësohem shumë se tani do të ekzistojë një plan për paqe për Ballkanin, sikurse ai i Lindjes së Mesme. Unë jam i mendimit që në këtë proces duhet të përfshihen të gjithë. Në çështjen e Kosovës duhet krijuar një marrëdhënie pragmatike me Moskën dhe Pekinin, sepse të dyja janë pjesë e Këshillit të Sigurimit të Kombeve të Bashkuara. Prandaj amerikanët dhe evropianët mund të negociojnë ose të gjejnë një zgjidhje, por nëse nuk arrihet edhe pajtimi i Moskës në veçanti, Kosova nuk do të jetë kurrë pjesë e OKB-së”, theksoi ai.
Kujtojmë se çështja e Kosovës u pështjellua ditët e fundit, pasi ndërsa SHBA përgatisnin takimin e 27 qershorit në Shtëpinë e Bardhë, Gjykata Speciale në Hagë publikoi një aktakuzë për presidentinThaçi. Prej këtij momenti, gjithçka u kthye përmbys. /tesheshi.com/
