Ish-eksperti i PD-së për ekonominë, tashmë zv.ministër financash në kabinetin “Rama”, Besart Kadia, e quajti thjesht të parealizueshëm programin ekonomik të shpalosur nga kreu demokrat Basha.
E kundërta, nëse do tentohej të realizohej, do ishte një fatkeqësi e tretë, tha ironikisht Kadia.
“Programi i PD me kujton shprehjen “Me ne fitojnë te gjithë”, premtime qe duhet te behet kujdes dhe te jemi racional. Ne kaluam një tërmet, pandeminë qe duam apo jo ka pasoja ekonomike dhe duhet te mendohet si te kalohet kjo vështirësi dhe më pas të rimëkëmbem. Kryesore është rimëkëmbja dhe në këtë rast ne jemi të shkëputur nga realitet dhe sfidat që ka ekonomia shqiptare.
Ulja e sigurimeve shoqërore e çon deficitin me 186 mln euro. Kjo në vetvete do alarmonte dhe FMN dhe Bankën Botërore. Rritja e pensioneve me 5 % në vit është shumë e mirë, por duhet të thuash skemën e madhe të financimi të tyre. Dhe kjo është 48 mln euro më shumë. Ose do mendosh që do mbushësh thesin ose ta mbajnë sa është. Por jo ta shpojmë atë, pasi shpenzimet janë marramendëse dhe të parealizueshme.
Do të ishte fatkeqësia e tretë pas tërmetit dhe pandemisë nëse realizohet ky program ekonomik. Ka kontradikta ideologjike dhe financiare.
Vetëm me ushqimin e bebeve shkon në 88 mln euro në vit.
Situata ekonomike është e vështirë, por këto pretendime të parealizueshme është si ta marrësh më qafë ekonominë. Nga një ideologji për thjeshtimin e shtetit në një super htet.
Thonë që gjithçka është falas sepse fjalët janë falas. Është e pamundur, e pamenaxhueshme dhe është shkatërruese për të gjithë sjelljen ekonomike të vendit”, tha Kadia gjatë një interviste në A1 Report.
Ish-njeriu i Bashës tha se “nuk jemi në kushtet e një rotacioni për hir të rotacionit”.
“Sfida e pandemisë dhe tërmetit janë shembulli që njerëzit e panë se çfarë është mirëmenaxhimi i shtetit. Në këtë këndvështrim patjetër që është e mundshme marrja e mandatit të tretë nga ana e kryeministrit Rama. Po shihet që në Shqipëri kemi një krizë të mirëmenaxhuar. Sot nuk flitet fare për ide por vetëm për kalkulime politike si të flitej për plaçkën e luftës dhe jo qeverisjen e qytetarëve”, arsyetoi Kadia. /tesheshi.com/
