Intervistoi: Blendi Gashi
Edhe pse thotë se dëshiron t’i futet politikës, ajo tashmë ka nisur të bëjë politikë. Ish-Miss Peja 2014, Ana Mehmetaj, nuk e ka më synim që të sfidojë me bukurinë, por me forcën e fjalës. Në një intervistë për tesheshi.com, ajo rrëfen se në ç`parti do dëshirontë të angazhohej dhe sepse ia ka dhënë për t`u bërë deputete. Dukshëm nuk i pëlqen opozita aktuale, por dhe presidentja Jahjaga, për të cilën shpreh mosdakortësi që ajo vijon të jetë presidente….
Kush është Ana Mehmetaj, nga vjen, shkollimi…?
Përshëndetje! Unë jam Ana Mehmetaj, nga qyteti i Pejës. Shkollimin fillor, të mesëm të ultë dhe të mesëm të lartë i kam përfunduar në vendlindje, ndërsa për momentin jam studente në Fakultetin e Drejtësisë në Universitetin “Haxhi Zeka” në Pejë. Pas një karriere disa vjeçare në fushën e modelizmit, në vitin 2014 vendosa të marrë pjesë në Miss dhe Mister Peja ku dhe fitova titullin e Miss Peja, nga mesi i shumë bukurosheve që garuan atë natë.
Jeni shprehur se në të ardhmen do të kyçeni në politikë…
Po, është e vërtet që kam shprehur interesimin që në një të ardhme të afërt të kyqem në politikë.
Kur pritni ta ndërmerrni këtë hap, të bëheni pra pjesë aktive e politikës?
Dëshira dhe vullneti që të kyçem në politikë daton që një kohë mjaft të gjatë. Arsyet janë nga më të ndryshmet, duke filluar nga arsyeja primare që është pozita e mjerueshme dhe assesi e tejkalueshme në të cilën gjendet politika dhe populli i Kosovës tash e sa kohë, duke u nisur nga rrethi shoqëror e deri te shoqëria në përgjithësi e cila dita-ditës fatkeqësisht po humb besimin tek institucionet.
Nëse do pranonit ftesa nga partitë aktuale kosovare, ofertën e cilës do ta pranonit?
Ofertën e Lidhjes Demokratike të Kosovës pa menduar dy herë me frymën ku edhe jam rritur.
Çfarë do të ndryshonit ju, cili do ishte fokusi juaj, të fuqizoni zërin e rinisë apo?
Po, normalisht qëllimi im do ishte ndryshimi pozitiv i rinisë. Mendoj se Kosova ka nevojë për figura të reja në të gjitha sferat, e më së shumti në politikë, sepse inatet dhe konfliktet që ekzistojnë për disa vite mes liderëve, kanë bërë që më së shumti ta pësojë rinia pasi kanë mbetur të papunë.
E shihni vetën në të ardhmen si një deputete e Kuvendit apo ëndërroni ndonjë post tjetër?
Është një nga qëllimet e mija që një ditë të bëhem deputete e Parlamentit të Kosovës. Do të ishte nder dhe privilegj për mua të reprezantoja shoqërinë e veçanërisht rininë në institucionin më të rëndësishëm të shtetit.
Sa është e vështirë me u marrë me politikë në Kosovë, sipas jush?
Për momentin mund të them se nuk është e lehtë marrja me politikë, sidomos për gjininë femërore, sepse edhe pas shumë avancimeve që kemi bërë, prapë femra është ajo që asnjëherë populli i Kosovës nuk i beson 100% në kapacitetin dhe aftësitë që ka .
Sa e përcjellni në përgjithësi politikën në vend. Si e shihni krizën aktuale politike, pse jo edhe zgjidhjen?
Politikën e përcjelli vazhdimisht sepse për fat të keq gjërat vetëm po ripërsëriten qe disa vite pa gjetur ndonjë zgjidhje. Si zgjidhje të mundshme dhe të vetme e shoh që opozita ta pranojë vullnetin e popullit që i votoi në zgjedhjet e kaluara, të qëndrojnë si opozitë deri në momentin nëse populli ynë e sheh të arsyeshme ndonjëherë t’i përkrahë që të vijnë në pushtet dhe mos ta përdorin rininë tonë dhe kohën tonë të çmuar për interesat e tyre personale dhe mllefit që kanë mes vete si lidera politikë.
Ju së fundmi keni thumbuar kreun e AAK-së Ramush Haradinaj, përmes një statusi që keni bërë në FB. Pse?
Po ju kam drejtuar me një status në rrjetet sociale dhe përkundër disa kërcënimeve në mënyrë të tërthortë që kam marrë, aspak nuk jam penduar.
Si e vlerësoni punën që bën presidentja Jahjaga, duhet të vazhdoi të mbetet në këtë post?
Respekt për presidenten e vendit tonë, edhe pse personalisht mendoj që nuk është person adekuat për pozitën që ushtron. Më çudit fakti pse nuk ka dhënë dorëheqje deri më tani nga ky post, pasi është kontrast me aftësitë e saj, duke filluar nga komunikimi me mediat e deri tek dhe mosndikimi i fjalës që ka tek populli.
Ka politikanë të mirë Kosova?
Në Kosovë vërtet ka politikanë që ne mund të mburremi me ta, por duhet t’iu ipet një mundësi dhe hapësirë më e madhe nga instituciont për t’i treguar vlerat dhe aftësitë e tyre.
Për fund, cili është mesazhi i juaj për të rinjtë që kanë synim të merren me politikë?
Mesazhi im për të rinjtë që synojnë t’i hyjnë politikës, që është rrugë mjaft e mundimshme, është që të kenë vetëbesim, mbështetje, vullnet, durim, guxim dhe gjithësesi, suksesi nuk do ju mungoj.
/tesheshi.com/
