Ish-ministrja e Integrimit në qeverinë “Berisha”, Majlinda Bregu, ka dhënë lajmin e emërimit të saj si Sekretare e Përgjithshme e Këshillit të Bashkëpunimit Rajonal.
“Jam e nderuar sot që për herë të parë më takon mua të drejtoj si e para shqiptare në një pozicion të lartë ekzekutiv, institucionin që ka si mision fuqizimin dhe rritjen e bashkëpunimit në vendet e Europës Juglindore!”, shkruan znj. Bregu në FB, duke e nisur statusin e saj me një mënyrë shumë euforike
“Fituam!
Unë fitova garën, por fitorja i takon vendit tim!
Faleminderit të gjithëve që besuan dhe më votuan për pozicionin e Sekretarit të Përgjithshëm të Këshillit të Bashkëpunimit Rajonal.
Mirënjohje të gjithëve,vendeve anëtare, institucioneve shqiptare, Komisionit Europian, EEAS( Shërbimi i Jashtëm i BE),Parlamentit Europian, familjes time politike EPP, e mbi të gjitha vendeve që votuan bindshëm kandidaturën time.
U përpoqën të gjithë, me qartësinë se drejtimi prej meje i këtij institucioni do të ishte fitore e Shqipërisë dhe shqiptarëve!
Një falenderim miqësor për Ditmirin. Na ndajnë sinoret politike, por na bashkoi qasja Europiane dhe përpjekja për të punuar pro Shqipërisë!
E di që do të jetë një sfidë e vështirë, por nganjëherë e vështira është më e mira!”, shkruan ish-ministrja Bregu.
Ajo është një prej të mënjanuarave të Bashës nga PD, njëherësh kundërshtare e ashpër e tij, dhe ky emërimin, i cili shoqërohet dhe me një falenderim për ministrin socialist Bushati, me gjasë mund ta klasifikojë si plangprishëse nga militanca demokrate. /tesheshi.com/
