Ish-ministri i Transporteve, Edmond Haxhinasto, është thirrur sot në Prokurori për të folur mbi tenderin e rrugës Tiranë-Elbasan, pjesë e hetimit ku janë arrestuar dy ish-drejtorë të rrugës.
Për rreth një orë, Haxhinasto, deputet i LSI—së në Elbasan, ka dëshmuar sot te Prokuroria e Krimeve të Rënda në cilësinë e personit që ka dijeni për rrethanat e hetimit, por ndaj tij ende nuk ka asnjë akuzë nga Prokuroria e Krimeve të Rënda.
“Jam thirrur për të dëshmuar për projektin e rrugës Tiranë- Elbasan që është në hetim. Jam pyetur për ato gjëra, për përgjegjësitë e mia si drejtues politik për një periudhë të zhvillimit të këtij projekti. Dëshmova ato gjëra që di” deklaroi ai.
Haxhinasto është zyrtari më i lartë që është thirrur për të qenë pjesë e një dosje të hapur prej dy vitesh nga prokuroria e Elbasanit. Ai u thirr në fundjavë, por zgjodhi ditën e hënë për t’iu përgjigjur fletëthirrjes së prokurorisë. /tesheshi,com/
