Ish-ministri i Drejtësisë, Ylli Manjani, bëri të ditur përmes rrjeteve sociale se do të shkëputet nga politika dhe do t´I përkushtohet avokatisë.
Siç duket, Manjani ka bërë realitet atë çka deklaroi ditën e largimit nga posti ministror, kur u pyet për të ardhmen e tij. Ish-ministri i Drejtësisë ka shprehur kritika të forta ndaj kryeministrit Edi Rama, por duket se u ndjeh i tradhëtuar edhe nga partia që përfaqësonte në qeveri, LSI.
Ai refuzoi përfshirjen në listat e kandidatëve për deputet në një renditje që nuk i garantonte aspak hyrjen në Kuvend në zgjedhjet e 25 qershorit, çka duket se ishte edhe marrja përfundimisht e vendimit për t´u tërhequr nga jeta aktive politike.
“Së bashku me një ekip partnerësh punëtorë e të mençur do mundohemi të bëjmë më të mirën tonë. Të vëmë në dispozicion gjithçka dimë në funksion të zgjidhjes së mosmarrëveshjeve”, shkruan Manjani në rrjetin social.
Komenti i Ylli Manjanit
Që sot e ne vijim do ti përkushtohem tërësisht Avokatisë. Punonjësit e Qëndrës së Shërbimeve (djali në sportelin nr 3) më ndihmuan të pajisem me NUIS (NIPTI).
Kam ndërmend të fokusohem tek këshilla ligjore për çdo kënd që ka një problem me shtetin.
Së bashku me një ekip partnerësh punëtorë e të mençur do mundohemi të bëjmë më të mirën tonë. Të vëmë në dispozicion gjithçka dimë në funksion të zgjidhjes së mosmarrëveshjeve.
Sa i takon angazhimeve të tjera, me të cilat jemi njohur deri më sot, kalojnë të gjitha në plan të dytë. Që do të thotë se ndonjëherë për ndonjë teme që ma ka qejfi dhe ma lejon koha, mund të shpreh ndonjë mendim.
Politika tashmë ka zgjedhur “punonjësit” e saj, të cilëve ju uroj veç të mira! Të jenë sa më shumë të sinqertë dhe të luajnë sa më pak teatër për llogari të shefave të tyre!
Për çështje të zbatimit të ligjit apo të funksionimit të drejtësisë do jem gjithnjë i gatshëm dhe në dispozicion.
Shumë faleminderit për komentet tuaja nëpër statuset e mia!
Jemi në kontakt në vijim, me statuse, komente e mendime të tjera. /tesheshi.com/
