Ndërsa Lëvizja Vetëvendosje ende s’është deklaruar zyrtarisht për marrëveshjen e re për Demarkacionin e cila parasheh ratifikimin e saj dhe më pas korrigjimin në gabimet eventuale, është ish-kreytari i kësaj partie Visar Ymeri ka thënë se gjërat mbesin të mjegullta dhe deputetët sërish do ta kenë të qartë çfarë po votojnë.
“Rendi i gjërave është i rëndësishëm. Po ta kishim rishikimin e Marrëveshjes për demarkacion para ratifikimit, deputetët do ta kishin të qartë se çka po votojnë. Dhe do të përcaktoheshin për PO se JO varësist rezultatit përfundimtar të negociimit e rishikimit, të përbrendësuar në një marrëveshje të re. Kështu, siç po raportohet se është arritur aneks marërveshje për rishikim, gjërat mbesin të mjegullta. Që e bën votën për ratifikim në Kuvend votë bllanko. Prapë, deputetët kërkohet të votojnë për një marrëveshje formën përfundimtare të së cilës nuk ia dijnë”, ka shtuar ai.
Rinegociimi i marrëveshjes për demarkacion, sipas Ymerit, është edhe hap edhe lajm i mirë. Por ka thënë se orari i akteve vendimmarrëse për këtë gjë është edhe i rrezikshëm, edhe i dëmshëm, edhe absurd.
“Absurd sepse nuk mund të votohet një marrëveshje e hapur, hapje kjo që vjen për shkak të rishikimit. E dëmshme sepse mirëmban një praktikë jo institucionale e jo demokratike të votës pa informatat e nevojshme, gjë që i hap mundësi mashtrimit. E rrezikshme sepse kështu deputetët mund të vendosin t’ia falin atë pjesë të tokës Malit të Zi, madje pa qenë të vetëdijshëm se po e bëjnë një gjë të tillë, e duke menduar që po e votojnë një marrëveshje për kufirin që e mbronë integritetin territorial të Republikës së Kosovës”, ka thënë ai. /tesheshi.com/
