Ilirjan Celibashi ish-ministri i larguar nga qeveria “Rama” por edhe ekspert i njohur zgjedhor, si dhe ish-kryetar i KQZ-së, ka deklaruar se maksimumi i mundshëm ligjor për të shtyrë datën e zgjedhjeve është një javë.
“Edhe nëse partitë bien dakord për të patur një datë zgjedhjesh, nuk ka asnjë mundësi kushtetuese dhe ligjore për të caktuar një datë tjetër zgjedhjesh. Dhe në vlerësimin tim dhe presidenti i Republikës nuk ka asnjë lloj mundësie dhe nëse partitë bien dakord për një datë tjetër zgjedhjesh. Përjashtimisht, mundet që data 25 mund të jetë një datë tjetër zgjedhjesh, pra një javë më vonë, po jashtë kësaj date, absolutisht për mendimin tim”, tha Celibashi për Top Channel
Por eksperti që ka lidhje familjare edhe me një nga liderët e opozitës deklaroi se KQZ nuk duhet të hyjë në debatin e hapur për datën e zgjedhjeve.
“Ky është një qëndrim politik qoftë i njërës palë apo i tjetrës. Dhe opinioni publik është i ndarë në lidhje me atë se sa qëndron pretendimi i opozitës për të pasur një qeveri teknike si garanci për zgjedhje të lira dhe të drejta. Po ashtu dhe pretendimi i maxhorancës së sotme sipas të cilës është një qeveri e zgjedhur dhe legjitime dhe ka mandat për të qeverisur deri në ditën e fundit të mandatit të saj. Në pikëpamje politike është vështirë të japësh një gjykim dhe secili e shikon sipas interesit të vet”, tha Celibashi, i cili nuk pranoi ta japë qëndrimin e tij për politikën por sipas ligjit. /tesheshi.com/
