Ish-kryeprokuroja e Shqipërisë, Ina Rama, ka shprehur kundërshtinë e saj me faktin e servirur në një shkrim të tesheshi.com, se moszgjedhja e saj si gjyqtare në Strabsurg kishte të bënte me probleme në deklarimin e pasurisë.
Bëhet fjalë për shkrimin: http://localhost/tesheshi/mberrin-materiali-pervelues-per-pasurine-e-kryeprokuroreve-ja-si-rezultoi-ina-rama/ dhe në brendësi të saj frazën: “Sipas të dhënave, më mirë në këtë verifikim ka dalë Ina Rama, por edhe kjo e fundit gjithsesi ka rezultuar se ka pasuri dhe prona që i janë gjetur jashtë deklarimit. Dhe pikërisht për këtë ajo është penalizuar dhe nuk ka mundur të zgjidhet dot si gjyqtare e Strazburgut…”
Por znj. Rama gjatë një bisede telefonike me redaksinë e tesheshi.com e përgënjeshtroi këtë fakt.
Dhe ne, si një detyrim etik që kemi për të mos cenuar askënd padrejtësisht, obligohemi ta publikojmë këtë ankesë dhe përgënjeshtrim të saj; ndonëse dhe artikullshkruesi, pjesë e stafit, mbrohet me të dhënat e burimit të lëndës së trajtuar.
Duhet të potencojmë në këtë rast se ankesa e znj. ish-kryeprokurore ndaj asaj çfarë është shkruar në lidhje me të, ka qenë e shoqëruar nga një gjuhë e rezervuar ndaj çdo akuze ndaj redaksisë, pa asnjë fjalë fyese apo përçmuese, siç mund të ndodhë me njerëz të irrituar dhe të kapluar nga nervoziteti në raste të tilla.
Dhe publikimi i përgënjeshtrimit të saj, nuk duhet të kuptohet si një autogol i redaksisë, por si një detyrim etik për ta përçuar dhe zërin e atyre që nga vlimi i lajmit, përplot emra brenda, përvëlohen ndoshta padrejtësisht qoftë dhe me një pikë, nga lënda e stërmadhe djegëse që gjendet në media.
Ndërsa për rastin konkret, siç mund të dallohet para frazës së kontestuar, është evidentuar dhe fakti që personi i Ina Ramës ka rezultuar pozitivisht në procesin e verifikimit; që do të thotë se në thelb shkrimi nuk ka patur asnjë qëllim në vetvete për të baltosur figurën e saj. /tesheshi.com/
