Të shtunën ka nisur në Doha të Katarit forumi i përvitshëm i Al Jazeera-s, që mbledh politikanë, akademikë e gazetarë, e ku diskutohet për një sërë temash rajonale.
Në vitin e tij të 11-të, forumi në fjalë ka këtë herë këtë slogan, siç raportohet te Al Jazeera, “Kriza shtetërore dhe e ardhmja e Lindjes së Mesme”.
I ftuar në forum është ish-kryeministri i Sirisë, Rijad Hixhab, që e pati lënë detyrën pas trazirave të 2011-s, për të drejtuar aktualisht opozitën siriane.
Në fjalën e tij, Rijad Hixhab ka nënvizuar në kuadër të “ekuacionit të ri” në Siri se nuk është e mundur që Beshar Esadi të qëndrojë më në pushtet.
“Eshtë bërë e qartë për aleatët e regjimit [sirian] se nuk është e mundur më që Beshar Esadi të qëndrojë në pushtet në dritën e ekuacionit të ri, të vënë në pah pas administratës së re amerikane.”
Ndërkohë që ka dënuar ndërhyrjen ruse dhe iraniane në Siri, ish-kryeministri sirian ka kritikuar gjithashtu mungesën e vullnetit ndërkombëtar për të vepruar kur bëhet fjalë për vënien në shenjë të civilëve, siç ngjet me përdorimin e armëve kimike.
Në forumin e organizuar nga Al Jazeera do të ketë hapësirë për të diskutuar mbi Pranverën Arabe, mbi praninë e Izraelit në botën arabe, e mbi të ardhmen e Lindjes së Mesme. /tesheshi.com/
